O‘zbekistonda havo va narsa-buyumlar yuzasidagi infeksiyalar, xususan, COVID-19 virusini yo‘q qiluvchi qurilma ixtiro qilindi, deb xabar bermoqda Innovatsion ishlanmalarni joriy etish ilmiy-amaliy markazi matbuot xizmati.
Qayd etilishicha, qurilma “Biogenetik” ilmiy ishlab chiqarish korxonasi tomonidan yaratilgan bo‘lib, noyabr oyida o‘tkazilgan InnoWeek.uz — 2020 innovatsion g‘oyalar haftaligi doirasidagi ko‘rgazmada namoyish etilgan.
Korxona direktori Olimjon Yusupovning aytishicha, qurilma virusni o‘ldirish xususiyatiga ega bo‘lib, bir necha bosqichli sinovlardan muvaffaqiyatli o‘tgan.
“Qurilma 3 xil hajmga ega bo‘lib maydon kengligiga qarab tanlanadi. Qurilma o‘zidan to‘yintirilgan elektronlar chiqaradi. Dastlabki sinovlar o‘tkazilganda havodagi mavjud zararli mikroblarni yo‘q qildi. Uni yangi modeli ustida ishlab, yanada takomillashtirilgach koronavirusga ham sinov tariqasida o‘tkazib ko‘rildi. Kutganlarimiz ijobiy natija berdi. Qurilma havodagi, sirtdagi barcha mavjud virus va koronavirusni butkul o‘ldiradi. Birinchi ko‘zlangan maqsad virusni zararsizlantirib, yerga tushirib, keyin yuvib tashlash edi. Ammo mukammallashtirilgan qurilma undan-da yaxshi natija berdi, ya’ni virusni havoda turgan holatda o‘ldirdi”, — degan u.
Olimjon Yusupovning bildirishicha, uskunada hech qanday dori vositasi yoki vaksina mavjud emas. Texnologiyadagi mavjud suyuqlik viruslarni o‘ldirish xususiyatiga ega. Inson organizmi uchun zararsiz. Biror mebel, matoli narsalar — sirtda mavjud barcha virusni daf qiladi. Uskuna 12 voltli tokda yoki batareyalar yordamida ham ishlaydi.
“Qurilma bir necha sinovlardan samarali o‘tdi. Hattoki klinik sinovlari ham nihoyasiga yetdi. Natija ijobiy. Qurilmaning avtomobillar uchun foydalaniladigan hajmini ham ishlab chiqdik. Tez tibbiy yordam uchun foydalanilayotgan Damas va Honda’da sinaldi. Yaxshi natija berdi. Qurilma uchun zarur bo‘lgan 12 volt, mashina uchun muammo emas”, — deb ta’kidlagan “Biogenetik” rahbari.
Ixtirochining so‘zlariga ko‘ra, qurilma narxi arzon bo‘ladi, chunki uskuna ham, uning tarkibiy qismlari ham O‘zbekiston ishlab chiqariladi. Ma’lum qilinishicha, qurilmani ishlab chiqarish ishlari boshlab yuborilgan.
Izoh (0)