Yaponiya hukumatning Iqtisodiy va ijtimoiy rivojlanish dasturi doirasida O‘zbekistonga qiymati 800 million iyena (7,3 million dollar) bo‘lgan yo‘l qurish texnikasini bepul taqdim etdi. Bu haqda Yaponiyaning O‘zbekistondagi elchixonasi matbuot xizmatiga tayanib, “Gazeta.uz” xabar berdi.
Texnikalarni topshirish marosimi 18-dekabr kuni bo‘lib o‘tgan. Marosimda Yaponiya elchisi Yoshinori Fujiyama va O‘zbekiston transport vaziri o‘rinbosari, Avtomobil yo‘llari qo‘mitasi raisi Abdurahmon Abduvaliyev ishtirok etgan.
Ma’lum qilinishicha, Yaponiyada ishlab chiqarilgan 16 ta yo‘l ta’mirlash texnikasi, shu jumladan, bitta yo‘l tekislovchi, ikkita bir barabanli katok, uchta tandemli katok, to‘rtta pnevmatik shinali katok va boshqa mashinalar Sirdaryo, Jizzax, Xorazm viloyatlari va Qoraqalpog‘istonning qishloq hududlariga yetkazib beriladi.
Elchixona xabarida aytilishicha, mazkur hududlardagi ko‘plab yo‘llarga shu paytgacha qoplama yotqizilmagan, shu sababli yilning iliq fasllarida kuchli yomg‘irlar yuzaga keltiradigan suv toshishi, ko‘chki bilan bog‘liq holatlar, sovuq oylarda esa yo‘lning muzlab qolishi bilan bog‘liq muammolar uchraydi. Tabiiy ofatlardan keyin tezda ta’mirlash va qayta tiklash qishloq joylarida iqtisodiy va ijtimoiy barqarorlikni ta’minlash uchun muhim vazifa hisoblanadi.
Yangi texnikalardan foydalanish sanab o‘tilgan hududlarda yo‘l qurish ishlarini muqobillashtirish va ishlar uchun ketadigan vaqtni qisqartirishga yordam berishi kutilmoqda.
Izoh (0)