Avstraliyalik tadqiqotchilar koronavirusga chalinganlar qayta kasallanishdan kamida 8 oy davomida himoya qiluvchi immunitet xotirasiga ega ekanligini aniqladi, deb xabar bermoqda “Interfaks”.
“Ushbu tadqiqot SARS-CoV-2 virusiga qarshi vaksinalar uzoq vaqt davomida ishlashining eng ishonchli dalilidir. Ilgari ko‘plab tadqiqotlar koronavirusga qarshi antitanalarning birinchi to‘lqini dastlabki bir necha oydan keyin susayishini ko‘rsatib, odamlar tezda immunitet yo‘qotishi mumkinligini xavotirini keltirib chiqargandi. Ushbu yangi ilmiy ish bu qo‘rquvni yo‘q qiladi”, — deyiladi xabarda.
Tadqiqotchilar COVID-19 bilan kasallangan 25 kishidan iborat guruhni jalb qilib, ulardan infeksiyaga chalingandan keyingi to‘rtinchi kundan boshlab, 242-kungacha 36 xil turdagi qon namunasini olgan.
Antitanalar reaksiyasi o‘rganilgan boshqa tadqiqotlar singari tadqiqotchilar virusga qarshi antitanalar soni infeksiyaga chalingandan 20 kun o‘tgach, pasayishni boshlaganini aniqlagan.
“Ammo, eng muhimi, barcha bemorlarda SARS-CoV-2 virusining ikki tarkibiy qismidan biri —nukleokapsid va oqsil tikanini tanigan B xotira hujayralari saqlanib qoldi. Ushbu virusga xos bo‘lgan xotira B hujayralari kasallangandan keyin sakkiz oy davomida barqaror saqlanib qolgan”, — deyiladi nashr xabarida.
Olimlarning fikriga ko‘ra, ushbu ma’lumotlar virusga qarshi vaksina samaradorligiga umid beradi va dunyo bo‘ylab virusga testi musbat chiqqan millionlab odamlarda qayta kasallanish holatlari juda kam bo‘lganligiga aniqlik kiritadi.
Izoh (0)