Qashqadaryo viloyati Chiroqchi tumanida odamlar bir sutkada 16 soatgacha elektr energiyasidan uzilgan holda yashashga majbur bo‘lmoqda. Bu haqda mazkur tumanda elektr energiyasi ta’minotining o‘chirilishi masalasida monitoring olib borgan O‘zbekiston iste’molchilar huquqlarini himoya qilish jamiyatlari federatsiyasi matbuot xizmati xabar berdi.
“Ob-havoning keskin sovib ketishi sababli iste’molchilarning elektr energiyasiga bo‘lgan ehtiyojlari kundan kun ortib bormoqda. Xususan, O‘zbekiston iste’molchilar huquqlarini himoya qilish jamiyatlari federatsiyasi joylarda elektr energiyasi va undagi uzilishlar yuzasidan monitoring ishlarini olib bormoqda. O‘rganishlar davomida Qashqadaryo viloyati Chiroqchi tumanida haqiqatda 12—16 soatgacha elektr tarmoqdan rejasiz uzilish holatlari kuzatildi. Natijada aholi tomonidan haqli e’tiroz va noroziliklar ko‘paymoqda”, — deyiladi xabarda.
Qayd etilishicha, O‘zbekiston iste’molchilar huquqlarini himoya qilish jamiyatlari federatsiyasi iste’molchilarning haq huquqlari buzilish holatlarini yuzaga keltirgan “Hududiy elektr tarmoqlari” bo‘yicha sudga da’vo arizalarini kiritib bormoqda.
Avvalroq Chiroqchida aholi e’tiroziga sabab bo‘lgan yaroqsiz simyog‘ochlar yangisiga almashtirilgani to‘g‘risida xabar berilgandi.
Mavzuga doir:
- Qashqadaryolik tadbirkor uch kun elektrsiz qolgani sabab olti mingta tovug‘idan ayrildi
- Kelesdagi tug‘ruqxona elektr ta’minotida uzilish kuzatildi. Holat yuzasidan izoh berildi
- Paxtaobodliklar elektr tokidagi muammo sabab “Daryo”ga shikoyat qildi. Mas’ullar esa jurnalistga murojaat qilgan aholini jazolashga urinmoqda
Izoh (0)