O‘zbekistonda xotin-qizlarga nisbatan bo‘layotgan tazyiq va zo‘ravonlik holatlari mamlakatning gender masalasiga oid xalqaro reytinglariga ham salbiy ta’sir ko‘rsatmoqda. Bu haqda Gender tenglikni ta’minlash masalalari bo‘yicha 21-dekabr kuni o‘tkazilgan komissiya majlisida so‘z yuritildi, deya xabar bermoqda “Daryo” muxbiri.
Komissiya raisi Tanzila Norboyevaning aytishicha, 2020-yilning yanvar—noyabr oyida himoya orderi olgan ayollarning qariyb 10 ming nafari oilasida tazyiq va zo‘ravonlikka uchragan.
“O‘tgan 11 oy davomida ichki ishlar organlari tomonidan turli tazyiq va zo‘ravonlikka uchragan 11 ming 138 nafar xotin-qizga himoya orderi berilgan. Ularning 9 ming 916 nafari yoki 89 foizi oilada tazyiq va zo‘ravonlikka duch kelgan. Bu kabi holatlar gender masalasiga oid xalqaro reytinglarimizga ham salbiy ta’sir ko‘rsatmoqda. Ushbu ko‘rsatkichlarning barchasi xalqaro miqyosda tahlil qilinadi. Lekin har doim ta’kidlaganimdek, biz reyting uchun emas, asosan, ayollarimiz manfaati, tinch-xotirjamligi va oilalarimiz mustahkam bo‘lishi uchun kurashamiz. Shu maqsadda yanada jiddiy ishlasak, reytinglardagi o‘rnimiz ham o‘z-o‘zidan yaxshilanadi. Reytinglarni yomonligi esa qilayotgan ishlarimiz samara bermayotganligini ko‘rsatyapti”, — dedi u.
Norboyevaning qo‘shimcha qilishicha, 2020-yilning dekabr oyiga qadar reablitatsiya markazlari tomonidan 5 ming 876 nafar ayolga yordam ko‘rsatilgan.
Mavzuga doir:
- “Ayol ishsizlikdan, qiynalganidan o‘zini yo farzandini sotyapti, deyish noto‘g‘ri” — Tanzila Norboyeva
- Tanzila Norboyeva tikuvchilik sexlaridagi ishchi ayollarning maoshi kamligini tanqid qildi
- O‘zbekistonda “Xalq banki” tizimida rahbar bo‘ladigan ayollar qanday ish bilan shug‘ullanishi ma’lum qilindi
Izoh (0)