Hozirgi kunga qadar Asaka, Farg‘ona tumanlari hamda Navoiy shahrida gaz bilan bog‘liq qonun buzilishi oqibatida, jami 739 million so‘mlik zarar yetkazilgan, deb xabar beradi “Kun.uz”.
Bosh prokuratura huzuridagi Departamentning Asaka tuman bo‘limi tomonidan o‘tkazilgan tergovga qadar tekshiruvda “Hududgaz” Andijon gaz ta’minot filiali, Asaka tuman bo‘linmasi mansabdor va moddiy javobgar shaxslari tumandagi tabiiy gaz yetib bormaydigan hududlardan demontaj qilingan 260 million so‘mlik turli hajmdagi gaz quvurlarini o‘zlashtirish yo‘li bilan talon-toroj qilgani aniqlangan.
Shuningdek, Departamentning Navoiy shahar bo‘limi tomonidan o‘tkazilgan tergovga qadar tekshiruvda “N.” xususiy korxonasi rahbarlari ohak ishlab chiqarish sexida o‘rnatilgan gaz hisoblagich ko‘rsatkichlarini o‘zgartirish maqsadida, gaz ta’minoti korxonasi manfaatlariga 437 million so‘m miqdorida zarar yetkazgani ma’lum bo‘lgan.
Bundan tashqari, Farg‘ona tumani Elektr tarmoqlari hudud inspektori M.A. “D.” xususiy korxonasiga qarashli yog‘ochni qayta ishlash sexiga o‘rnatilgan elektr hisoblagichning nosozligi sababli kelib chiqqan 42 million so‘m qarzdorlikni ETK bazasidan chiqarib, yangi hisoblagich o‘rnatib berish evaziga 3 million so‘mni firibgarlik yo‘li bilan olganligi aniqlanib, qo‘lga olingan.
Hozirda mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
Avvalroq Sergelidagi qozonxonada gaz o‘g‘irlangani yuzasidan jinoyat ishi qo‘zg‘atilgani to‘g‘risida xabar berilgandi.
Izoh (0)