Ҳозирги кунга қадар Асака, Фарғона туманлари ҳамда Навоий шаҳрида газ билан боғлиқ қонун бузилиши оқибатида, жами 739 миллион сўмлик зарар етказилган, деб хабар беради «Kun.uz».
Бош прокуратура ҳузуридаги Департаментнинг Асака туман бўлими томонидан ўтказилган терговга қадар текширувда «Ҳудудгаз» Андижон газ таъминот филиали, Асака туман бўлинмаси мансабдор ва моддий жавобгар шахслари тумандаги табиий газ етиб бормайдиган ҳудудлардан демонтаж қилинган 260 миллион сўмлик турли ҳажмдаги газ қувурларини ўзлаштириш йўли билан талон-торож қилгани аниқланган.
Шунингдек, Департаментнинг Навоий шаҳар бўлими томонидан ўтказилган терговга қадар текширувда «Н.» хусусий корхонаси раҳбарлари оҳак ишлаб чиқариш цехида ўрнатилган газ ҳисоблагич кўрсаткичларини ўзгартириш мақсадида, газ таъминоти корхонаси манфаатларига 437 миллион сўм миқдорида зарар етказгани маълум бўлган.
Бундан ташқари, Фарғона тумани Электр тармоқлари ҳудуд инспектори М.А. «Д.» хусусий корхонасига қарашли ёғочни қайта ишлаш цехига ўрнатилган электр ҳисоблагичнинг носозлиги сабабли келиб чиққан 42 миллион сўм қарздорликни ЭТК базасидан чиқариб, янги ҳисоблагич ўрнатиб бериш эвазига 3 миллион сўмни фирибгарлик йўли билан олганлиги аниқланиб, қўлга олинган.
Ҳозирда мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Сергелидаги қозонхонада газ ўғирлангани юзасидан жиноят иши қўзғатилгани тўғрисида хабар берилганди.
Изоҳ (0)