IIV fohishaxonalardan tayyorlangan reportajlar sabab biror suitsid bo‘lmaganini ma’lum qildi. Tanzila Norboyeva bunday reportajlarda ayollarning yuzi ko‘rsatilishini qoraladi

O‘zbekistonda telekanallar orqali huquqni muhofaza qiluvchi organlarning fohishalik bilan shug‘ullanayotganlar va fohishaxonalarni fosh etishga bag‘ishlangan reyd tadbirlari haqida reportajlar muntazam berib boriladi. Unda, jumladan, huquqbuzarlik holatlarini sodir etish vaqtida qo‘lga tushgan shaxslar, xususan, gumonlanuvchi ayollar ham ko‘rsatiladi.

Gender tenglikni ta’minlash masalalari bo‘yicha komissiyaning 21-dekabr kuni bo‘lib o‘tgan majlisida jurnalistlar bunday reydlar haqidagi reportajlarni telekanallar orqali ochiq ko‘rsatish salbiy oqibatlarga, masalan, efirga olib chiqilgan ayollarning o‘z joniga qasd qilish holatlariga sabab bo‘lmaydimi degan mazmundagi savol bilan mutasaddilarga murojaat qildi.

Ichki ishlar vaziri o‘rinbosari Azizbek Ikromov Toshkent shahrida fohishalik masalasi juda ko‘payganini alohida ta’kidlarkan, shu vaqtgacha telekanallar orqali ko‘rsatilgan reyd-reportajlar sabab biror ayol o‘z joniga qasd qilmaganini ma’lum qildi, deya xabar bermoqda “Daryo” muxbiri Mirolim Isajonov.

“To‘g‘risi, Toshkentda fohishalik masalasi juda ko‘paygan. Spa-salon va tungi klublar ham ko‘payib ketgan. Turli huquqbuzarliklar, jinoyatchilikka qarshi kurashish va ularning oldini olish maqsadida bu kabi tadbirlarni o‘tkazyapmiz hamda buni xalqqa ochiq namoyish qilib boryapmiz. Kerak bo‘lsa, klub rahbarlariga chora ko‘ryapmiz, ayol va yosh qizlarimizni ma’muriy javobgarlikka ham tortyapmiz. Shuni alohida ta’kidlamoqchimanki, o‘tkazilgan reydlar natijasida shu paytga qadar ayollar orasida birorta ham suiqasd aniqlanmagan”, — dedi vazir o‘rinbosari Ikromov.

Ushbu savol bo‘yicha komissiya rahbari, Senat raisi Tanzila Norboyeva ham fikr bildirib, fohishalik bilan shug‘ullanishda gumon qilingan xotin-qizlarning yuzini telekanallar orqali ko‘rsatib, “o‘lganning ustiga tepgan qilish” shart emasligini alohida uqtirdi.

“Yomon yo‘lga yurgan ayolni ism-familiyasi bilan ijtimoiy tarmoqlarga qo‘yishingizga komissiya raisi sifatida sal e’tiroz bildiraman va qarshiman. Komissiyamizning barcha a’zolari bunga qarshi. Chunki u ayol har xil sabablarga ko‘ra shu yo‘lga kirib qolgan bo‘ladi. O‘lganni ustiga tepgan qilib, yana uning yuzini ko‘rsatib, tarmoqlarda battar sharmanda qilsak, bu ertaga suitsid holatiga olib keladi. Buni hayp qilish kerak emas. Avvalo, o‘sha ayolning muammosini aniqlab, uni bartaraf etish bo‘yicha ishlash lozim”, — dedi Norboyeva xonim.