Shavkat Mirziyoyev 2020-yil 12–13-dekabr kunlari Xorazm viloyatiga qilgan tashrifi chog‘ida Amudaryo ustida Xorazmni Qoraqalpog‘iston bilan bog‘laydigan 413 metrli ko‘prik, Qorao‘zak tumanidan Shovot tumanigacha 79 kilometrli temiryo‘l qurilishi bo‘yicha topshiriq bergan edi.
O‘zAning xabar berishicha, 22-dekabr kuni ikki hududni birlashtiradigan qo‘shma ko‘prikka tamal toshi qo‘yildi. Yangi ko‘prik qurilishning boshlanganligi munosabati bilan tantanali tadbir tashkil etildi.
Unda O‘zbekiston bosh vazirining birinchi o‘rinbosari Ochilboy Ramatov, Xorazm viloyati hokimi Farhod Ermanov, Qoraqalpog‘iston Jo‘qorg‘i Kengesi raisi Murat Kamalov, Qoraqalpog‘iston Vazirlar Kengashi Raisi Qahramon Sariyev va boshqalar so‘zga chiqib, mazkur ko‘prik nafaqat ikki hudud, balki mamlakatning ijtimoiy-iqtisodiy rivojida muhim ahamiyat kasb etishini ta’kidladi.
Bugungi kunda Qoraqalpog‘iston hamda Amudaryo tumani respublikaning boshqa hududlaridan uzilib qolgan, shuningdek, temiryo‘l tarmoqlariga ham to‘g‘ridan to‘g‘ri bog‘lanish imkoni mavjud emas. Avtomobil transporti qatnovi ham cheklangan, chunki Amudaryodan o‘tish uchun faqat ponton ko‘prikdan foydalaniladi.
Ponton ko‘prigi 1938-yilda qurilgan bo‘lib, ayni paytda u eskirgan va foydalanishga yaroqsiz holga kelib qolgan. Qoraqalpog‘iston va Amudaryo tumani mamlakatning boshqa hududlaridan transport harakati jihatidan ajralgani mintaqaning ijtimoiy-iqtisodiy rivojiga salbiy ta’sir ko‘rsatibgina qolmay, mintaqaning ehtiyojlari uchun kerakli bo‘lgan xalq xo‘jaligi yuklarini tashish xarajatlari evaziga narxlarning oshishiga va ushbu hududlardan mahsulot eksport qilinishi uchun 160 kilometr masofaga transportda qo‘shimcha yurishga sabab bo‘ladi.
Yangi ko‘prikning qurilishi Rossiya va Qozog‘istondan yuklarni tashish masofasini 240 kilometrga, yuklarni tashish vaqtini esa 6 soatga qisqartiradi. Shunday qilib, yuk tashish hajmi ikki baravar ko‘payadi va yiliga 25 million tonnani tashkil etadi. Mamlakatning yuqoridagi mintaqalari rivojlanib borishi bilan iqtisodiy samaradorlik yiliga 100 milliard so‘mga oshadi. Bundan tashqari, Qoraqalpog‘istondan Xorazmga inert materiallarni yetkazib berish xarajatlari kamayadi, bu esa ijtimoiy obyektlar va infratuzilmalarni qurish xarajatlarini kamaytiradi.
Taklif etilayotgan yangi ko‘prikning strategik ahamiyati alohida ta’kidlangan. “O‘zbekiston temir yo‘llari” tomonidan ko‘prik quriladigan joyda daryo kengligining minimal o‘lchamlari, sun’iy inshootlar soni, buzilayotgan obyektlar soni va ularning turi, shuningdek, kommunikatsiyalar o‘tkazilishini hisobga olgan holda amalga oshiriladigan loyihaning 4 ta varianti ishlab chiqildi va ulardan eng maqbuli tanlandi.
Xorazm viloyatini Qoraqalpog‘iston bilan bog‘lovchi temiryo‘l va avtomobil yo‘li qo‘shma ko‘prigini qurish ishlari 2022-yil sentabr oyiga yakunlanishi rejalashtirilgan.
Avvalroq Farg‘ona vodiysidan Xorazmga aviaqatnov yo‘lga qo‘yilishi haqida xabar berilgandi.
Izoh (0)