“Ayol ishsizlikdan, qiynalganidan o‘zini yo farzandini sotyapti, deyish noto‘g‘ri” — Tanzila Norboyeva

Ayrim ayollar ma’naviyati sayozligi, dunyoqarashi yoki sog‘lig‘ida muammo borligi uchun fohishalik yo‘liga kirib qolmoqda. Bu haqda Gender tenglikni ta’minlash masalalari bo‘yicha komissiyaning 21-dekabr kuni bo‘lib o‘tgan yig‘ilishida Tanzila Norboyeva fikr bildirdi.

Senat raisi Ikkinchi Jahon urushining og‘ir yillarida O‘zbekistonda ayollar “qiynalgan bo‘lsa ham, o‘zini sotmagani”ni, bu “ma’naviyat, tarbiyaga bog‘liq” ekanini alohida ta’kidladi.

“Barchamiz yaxshi bilamizki, Ikkinchi Jahon urushida O‘zbekiston juda qiyin ahvolda edi. O‘sha paytda o‘zimiz kambag‘al bo‘lsak-da, ko‘plab boshqa yurt bolalarini ham qabul qilganmiz. Hamma erkaklar urushga ketib, ayollar qiynalgan bo‘lsa ham, ammo o‘zini sotmagan. Bu ma’naviyat, tarbiyaga bog‘liq”, — dedi u.

Tanzila Norboyevaning qayd etishicha, “aynan hozirgi davrda” ayrim ayollarning fohishalik bilan shug‘ullanishiga yo‘qchilik sabab emas.

“Ayol yo‘qchilikdan hech qachon o‘zini sotmaydi, aynan hozirgi davrda. Hozir ishlayman degan ayolga baribir qandaydir ish topiladi. Ayol ishsizlikdan, qiynalganidan o‘zini yo farzandini sotyapti, deyish noto‘g‘ri. Ayrim ayollar ma’naviyati sayozligi, dunyoqarashi, asabi yoki sog‘lig‘ida muammo borligi uchun shu holatga tushmoqda”, — deya qo‘shimcha qildi Norboyeva xonim.