O‘zbekistonda boshqaruv lavozimlarida ishlayotgan ayollarning ulushi 26,6 foizga yetdi. Bu haqda 21-dekabr kuni O‘zbekistonda gender tenglikni ta’minlash masalalariga bag‘ishlangan anjumanda Oliy Majlis Senati raisi Tanzila Norboyeva ma’lum qildi, deya xabar bermoqda “Daryo” muxbiri Mirolim Isajonov.
Gender tenglikni ta’minlash masalalari bo‘yicha komissiyasining majlisida boshqaruv lavozimlarida ayollarning ulushi 26,6 foizga yetgani aytib o‘tildi.
“Bu biz uchun juda katta muvaffaqiyat deb hisoblayman. Men endigina Xotin-qizlar qo‘mitasida ish boshlaganimda, menga shahar va tuman hokimliklarida ayollarning o‘rni yo‘q deb aytishar edi. O‘sha paytda ayol rahbarlar ba’zi hududlarda umuman yo‘qligi yoki kamligini bilar edik. Lekin yuqori lavozimga tayyor bo‘lmagan ayollarni o‘qqa-cho‘qqa tashlash noto‘g‘ri”, – dedi Gender tenglikni ta’minlash masalalari bo‘yicha komissiyasi raisi Tanzila Norboyeva.
Oliy Majlis Senati raisining fikricha, ayollarni yuqori lavozimga tayyorlash, kerakli bilim va ko‘nikmalarni berish zarur.
“Chunki hukumat bilan, davlat rahbari bilan ishlashning o‘zi bo‘lmaydi. Hozirgi zamon juda shiddat bilan rivojlanmoqda, talab ham kuchli bo‘ladi. Shuning uchun ertaga rahbar lavozimida ‘eplayolmapti’ degan so‘z bo‘lmasligi kerak. Mana ayni paytda 48 nafar deputat, 25 nafar senator ayollarimiz yoki mahalliy kengashlarda 25 foizni tashkil qilmoqda. Albatta, keyingi saylovlarda 30 foizga chiqish uchun harakat qilamiz, balki osharmiz ham”, – dedi Senati raisi.
“Xabaringiz bor, tumanlarimiz hozirda ijtimoiy va iqtisodiy kelib chiqishidan ‘qizil’, ‘sariq’ hamda ‘yashil’ kabi reytinglarga bo‘lingan. Ahvoli juda yomon bo‘lgan tumanlar ‘qizil’, o‘rtachasi ‘sariq’ va ‘yashil’ rivojlangan tuman yashil deb baholanmoqda. Bizning ayollar rahbarlik qilayotgan tumanlar ‘yashil’ hududga chiqib oldi. Bu esa ayollar erkaklardan qolishmasligi, o‘z ishini eplay olayotganligining isboti deb o‘ylayman. Albatta, ularga qonuniy jihatdan qandaydir yordam berayotgandirmiz, lekin, asosiy ishni o‘zlari qilishyapti” , – dedi Tanzila Norboyeva.
Avvalroq Tanzila Norboyeva “Uyalib qolmaslik uchun ayol hokimlarga o‘zim yordam berib turibman”, degan edi.
Eslatib o‘tamiz, oktabr oyida Bo‘ston tumani hokimi Sadbarxon Mamitova fermerlarni haqoratlab, yerni olib qo‘yish bilan tahdid qilgani uchun viloyat hokimligi tomonidan ogohlantirilgan edi.
“Ishonaman — ayollar rahbar bo‘lgan tumanlarda adolat bayrog‘i boshqacha hilpiraydi. Biz hokimlikka saylangan rahbar ayollarimizga doim yordam beramiz, yelkadosh bo‘lamiz. Bundan keyin ham katta-katta tashkilot va kompaniyalar rahbarligiga ayollarni tayinlash tashabbusi davom etadi. Biz ularni tayyorlayapmiz. Kimlargadir bu ish yoqmas, lekin menga yoqadi” — degandi Prezident.
Izoh (0)