Avazxon Ergashev Sirdaryo viloyati hokimining qishloq va suv xo‘jaligi masalalari bo‘yicha o‘rinbosari etib tayinlandi. Bu haqda “Daryo” muxbiri xabar bermoqda.
Ma’lum bo‘lishicha, 20-dekabr kuni Qo‘rg‘ontepa tumani hokimligida Avazbek Ergashevni kuzatish marosimi o‘tkazilgan. Unda tuman faollari 16 yillik hokim bilan ko‘zida yosh bilan xayrlashgan.
Avazbek Ergashev 1966-yilda Oltinko‘l tumanida tug‘ilgan. Andijon paxtachilik instituti (hozirgi Andijon qishloq xo‘jaligi va agrotexnologiyalar instituti)ni tamomlagan. 2006-yil 18-yanvardan buyon Qo‘rg‘ontepa tumaniga rahbarlik qilib kelgan. 2015—2019-yillarda Oliy Majlis Senati a’zosi bo‘lgan.
Avazxon Ergashev yangi lavozimda 18-dekabr kuni Xorazm viloyati hokimining qishloq va suv xo‘jaligi bo‘yicha o‘rinbosari etib tayinlangan Komiljon Sobirov o‘rnini egalladi.
Avvalroq Sirdaryoning Mirazaobod tumaniga Jonibek Yariyev hokim etib tayinlangani, 25-noyabrda esa Sirdaryo tumani hokimi Alijon Muhammadiyev egallab turgan lavozimidan ozod etilib, uning o‘rniga Botirjon Mirzaqulov tayinlangani to‘g‘risida xabar berilgandi.
Izoh (0)