Ўзбекистонда бошқарув лавозимларида ишлаётган аёлларнинг улуши 26,6 фоизга етди. Бу ҳақда 21 декабрь куни Ўзбекистонда гендер тенгликни таъминлаш масалаларига бағишланган анжуманда Олий Мажлис Сенати раиси Танзила Норбоева маълум қилди, дея хабар бермоқда «Дарё» мухбири Миролим Исажонов.
Гендер тенгликни таъминлаш масалалари бўйича комиссиясининг мажлисида бошқарув лавозимларида аёлларнинг улуши 26,6 фоизга етгани айтиб ўтилди.
«Бу биз учун жуда катта муваффақият деб ҳисоблайман. Мен эндигина Хотин-қизлар қўмитасида иш бошлаганимда, менга шаҳар ва туман ҳокимликларида аёлларнинг ўрни йўқ деб айтишар эди. Ўша пайтда аёл раҳбарлар баъзи ҳудудларда умуман йўқлиги ёки камлигини билар эдик. Лекин юқори лавозимга тайёр бўлмаган аёлларни ўққа-чўққа ташлаш нотўғри», – деди Гендер тенгликни таъминлаш масалалари бўйича комиссияси раиси Танзила Норбоева.
Олий Мажлис Сенати раисининг фикрича, аёлларни юқори лавозимга тайёрлаш, керакли билим ва кўникмаларни бериш зарур.
«Чунки ҳукумат билан, давлат раҳбари билан ишлашнинг ўзи бўлмайди. Ҳозирги замон жуда шиддат билан ривожланмоқда, талаб ҳам кучли бўлади. Шунинг учун эртага раҳбар лавозимида ‘эплаёлмапти’ деган сўз бўлмаслиги керак. Мана айни пайтда 48 нафар депутат, 25 нафар сенатор аёлларимиз ёки маҳаллий кенгашларда 25 фоизни ташкил қилмоқда. Албатта, кейинги сайловларда 30 фоизга чиқиш учун ҳаракат қиламиз, балки ошармиз ҳам», – деди Сенати раиси.
«Хабарингиз бор, туманларимиз ҳозирда ижтимоий ва иқтисодий келиб чиқишидан ‘қизил’, ‘сариқ’ ҳамда ‘яшил’ каби рейтингларга бўлинган. Аҳволи жуда ёмон бўлган туманлар ‘қизил’, ўртачаси ‘сариқ’ ва ‘яшил’ ривожланган туман яшил деб баҳоланмоқда. Бизнинг аёллар раҳбарлик қилаётган туманлар ‘яшил’ ҳудудга чиқиб олди. Бу эса аёллар эркаклардан қолишмаслиги, ўз ишини эплай олаётганлигининг исботи деб ўйлайман. Албатта, уларга қонуний жиҳатдан қандайдир ёрдам бераётгандирмиз, лекин, асосий ишни ўзлари қилишяпти» , – деди Танзила Норбоева.
Аввалроқ Танзила Норбоева «Уялиб қолмаслик учун аёл ҳокимларга ўзим ёрдам бериб турибман», деган эди.
Эслатиб ўтамиз, октябрь ойида Бўстон тумани ҳокими Садбархон Мамитова фермерларни ҳақоратлаб, ерни олиб қўйиш билан таҳдид қилгани учун вилоят ҳокимлиги томонидан огоҳлантирилган эди.
«Ишонаман — аёллар раҳбар бўлган туманларда адолат байроғи бошқача ҳилпирайди. Биз ҳокимликка сайланган раҳбар аёлларимизга доим ёрдам берамиз, елкадош бўламиз. Бундан кейин ҳам катта-катта ташкилот ва компаниялар раҳбарлигига аёлларни тайинлаш ташаббуси давом этади. Биз уларни тайёрлаяпмиз. Кимларгадир бу иш ёқмас, лекин менга ёқади» — деганди Президент.
Изоҳ (0)