AQSh prezidenti Donald Tramp administratsiyasining yuqori martabali amaldorlari davlat rahbari o‘z vakolatini suiiste’mol qilib, saylov natijalarini bekor qilishidan xavotirda. “Kommersant”ning yozishicha, bu haqda Axios manbalari xabar berdi.
Xavotirning sababi prezident o‘zining milliy xavfsizlik bo‘yicha sobiq yordamchisi Maykl Flinn va advokat Sidni Pauell bilan ko‘p vaqt o‘tkazayotgani bilan bog‘liq.
Qayd etilishicha, “prezidentning Twitter’da siyosatchilarni qamash bilan tahdid qilishi va aqldan ozgan fitna nazariyotchilari bilan suhbatlashishga ko‘p vaqt sarflashi” tashvishlantirmay qolmaydi.
Avvalroq Maykl Flinn prezidentga harbiy holat e’lon qilish va ikkilanadigan shtatlarda qaytadan saylov o‘tkazish uchun harbiy qo‘shinlardan foydalanishni taklif qilgan. Sidni Pauell esa ovoz beruvchi mashinalarni tekshiruvdan o‘tkazishni taklif qilgan.
Saylov natijasiga ko‘ra, demokrat Jo Bayden 306 tadan 270 ta ovozni qo‘lga kiritgan. Donald Tramp 232 ta ovoz olgan. Barcha “ikkilangan” shtatlarda Bayden foydasiga ovoz berilgan. Tramp saylov natijalarini tan olmagan. U ovozlarni soxtalashtirilgan deb hisoblaydi.
Eslatib o‘tamiz, 15-dekabr kuni saylovchilar hay’ati Jo Baydenning AQSh prezidenti etib saylanganini tasdiqladi. Bayden uchun saylovchilarning 306 ta, Donald Tramp uchun 232 ta ovozi berilgan. G‘alaba uchun esa 270 ta ovoz to‘plash kerak edi. 23-dekabrgacha saylovchilar hay’ati ovozlaridan iborat byulletenlar Vashingtonga yetkaziladi. 2021-yil 6-yanvar kuni ovozlar AQSh Kongressi Vakillar palatasi va Senatning qo‘shma majlisida hisoblab chiqiladi. 20-yanvar kuni saylangan prezidentning inauguratsiyasi bo‘lib o‘tadi.
Dekabr oyi boshida Tramp saylovlar halol bo‘lgan taqdirdagina mag‘lubiyatini tan olishini bildirgandi. “Men saylovda mag‘lub bo‘lishga qarshi emas, balki u adolatli bo‘lishini xohlayman. Istamaydigan narsam shuki, saylovlar Amerika xalqidan o‘g‘irlab olinmasin”, — degan edi Tramp. Keyinroq u 2024-yilda davlat rahbari lavozimiga o‘z nomzodini qo‘yishi mumkinligini aytgan.
Izoh (0)