Moskvada 1995-yilda ishlab chiqarilgan pikap kuzovidagi ikki qatorli kabinaga ega modifikatsiyaga uchragan “Moskvich” sotuvga qo‘yildi. Hozirga qadar 99 ming kilometr yo‘l bosgan ko‘k rangli ushbu noodatiy avtomobil 900 ming rublga (12,2 ming dollar) baholanmoqda, deb xabar beradi Motor.
Pikap kuzovidagi “Moskvich” 2335 “AZLK-2141” bazasida yaratilgan. 640 kilogramm yukni ko‘tarishga qodir kichik seriyali avtomobil 1994-yildan 2002-yilga qadar ishlab chiqarilgan. 1998-yildan boshlab model “Svyatogor” nomini olgan. Sobiq Ittifoq avtomobil sanoati ikki qatorli kabinaga ega besh eshikli avtomobil bazasida uzaytirilgan xetchbeklar, furgonlar va hatto tajriba tariqasida elektropikaplarni yaratgan. Biroq ularning hech biri klassik “qirq birinchi” kabi mashhurlikka erishmagan.
Sotuvga qo‘yilgan nusxaning tashqi ko‘rinishi ideal holatda. Pikap yaqinda restavratsiya qilingan bo‘lib, hozirda “Moskvich” kuzovi xuddi yangidek. Biroq mashina interyerining suratlari e’lon qilinmagan. Avtomobil qo‘lda ko‘tariladigan oyna, kasset audiotizim va yengil qotishmali diskalar bilan jihozlangan.
“Moskvich” kapoti ostidan 76 ot kuchiga ega 1,6 litrli benzin dvigatel o‘rin olgan bo‘lib, u 5 pog‘onali mexanik uzatmalar qutisi yordamida boshqariladi. 25 yil davomida pikapga bir kishigina egalik qilgan. Bundan tashqari, uning ta’kidlashicha, ishlab chiqarish davomida konveyrdan jami 10 nusxa shu kabi model chiqqan xolos.
Avvalroq Ukrainada hali zavoddagi plyonkasi olib tashlanmagan 30 yillik “Moskvich” topilgani to‘g‘risida xabar berilgandi.
Izoh (0)