Ukrainada hali zavoddagi plyonkasi olib tashlanmagan 30 yillik “Moskvich” topildi (video)

Ukrainaning Nikopol shahrida navbatdagi “vaqt kapsulasi” — 1990-yilda ishlab chiqarilgan “AZLK-2141” topildi. Avtomobil shu vaqtga qadar 1996 kilometr masofa bosgan bo‘lib, uning salonidagi zavod plyonkasi hali olib tashlanmagan, deb xabar beradi Roma Uracco.

Ma’lumotlarga ko‘ra, avtomobil 1990-yillarda Moskvadan minib kelingan va o‘shandan buyon deyarli haydalmagan. “Moskvich”ning sovet davriga oid tranzit raqamlari ham saqlab qolingan.

2014-yilga qadar avtomobil quruq va issiq garajda saqlangan, shu sababli yoshiga qaramay mashina kuzovi yaxshi saqlanib qolgan. Olcha rangli mashinaning saloni jigarrang tusda jihozlangan.

“Moskvich”ga 71 ot kuchiga ega “UZAM-331.10” indeksli dvigatel o‘rnatilgan bo‘lib, oradan shuncha vaqt o‘tgan bo‘lsa-da, bir marta urinishdayoq o‘t olgan. Avtomobil birgina “restavratsiya”ga muhtoj bo‘lgan — moyi, barcha filtrlari va akkumulyatori almashtirilgan.

“Moskvich” ichidan avtomobildan foydalanish bo‘yicha eksport instruksiyasi va ko‘plab original qog‘oz hamda kvitansiyalar topilgan. Shuningdek, o‘tgan 30 yil davomida mashina bilan birga muhrlangan olcha rangli emal bankasi ham saqlangan.