“Qishloq qurilish bank” Qashqadaryo viloyatiga press-tur tashkil qildi

ATB “Qishloq qurilish bank” o‘z mijozlariga ko‘rsatilayotgan barcha turdagi bank xizmatlari sifatini yanada oshirib bormoqda. Buning natijasida mijozlarga qulayliklar yaratilmoqda.

Hududlarda tatbiq qilinayotgan loyihalarni tanishtirish maqsadida ATB “Qishloq qurilish bank” tomonidan ommaviy axborot vositalari vakillari uchun Qashqadaryo viloyatiga press-tur tashkil qilindi.

Press-tur ishtirokchilari bankning Qashqadaryo mintaqaviy filiali ochilish marosimida qatnashdi. Filialning yangi binosi “Qishloq qurilish bank” mijozlari uchun o‘ziga xos sovg‘a bo‘ldi, deyish mumkin. Ochilish marosimida so‘zga chiqqan bank boshqaruvi, Qashqadaryo viloyati hokimligi rahbarlari filialning yangi binosi respublika bank tizimida amalga oshirilayotgan iqtisodiy islohotlarning yana bir samarasi ekanligini ta’kidladi.

Yangi binoda yaratilgan qulayliklar hisobiga endilikda bank mijozlari buxgalteriya hisob-kitoblari, valyuta ayriboshlash, pul o‘tkazmalari, omonat hamda turli to‘lovlar bilan bog‘liq zarur xizmatlardan shu yerning o‘zida foydalanish imkoniyatiga ega bo‘lishdi. Elektron navbat tizimining mavjudligi esa bank xodimlari va mijozlar uchun qo‘shimcha qulaylik yaratadi. Filialning zamonaviy bank texnologiyalari bilan jihozlangani esa sifatli xizmat ko‘rsatish imkoniyatini oshiradi.

Bugungi kunda Qashqadaryo mintaqaviy filialida 5000 nafardan ortiq omonatchilar, 5200 dan ortiq yuridik shaxslarga xizmat ko‘rsatilmoqda. Filial orqali 72000 dan ortiq fuqarolar bank kartalaridan foydalanib kelmoqda. Shuningdek, viloyatda “Qishloq qurilish bank”ning Ko‘kdala va Yakkabog‘ filiallari ham mijozlarga xizmatlar ko‘rsatmoqda.

Press-tur doiraisda ommaviy axborot vositalari vakillari bank filiallaridagi sharoitlar, ko‘rsatilayotgan xizmatlar bilan tanishdilar va mijozlar bilan suhbatlashdilar.

Jurnalistlar bank tomonidan qo‘llab-quvvatlanayotgan bir qator investitsion loyihalar, Yakkabog‘ tumanini ijtimoiy-iqtisodiy rivojlantirish borasida mahalliy hokimlik idoralari va bank hamkorligida tatbiq qilinayotgan loyihalar bilan ham bevosita tanishdi.

Xususan, Yakkabog‘ tumanidagi “Chiroyli mebel” MChJ, “Delta FBS” MChJ korxonalarida va tumanda bank tomonidan tashkil qilingan Tadbirkorlarni o‘qitish markazida qizg‘in muloqotlar bo‘ldi.

Bank axborot xizmati

Reklama huquqi asosida.