Ўзбекистон ташқи қарзининг умумий ҳажми 2020 йилнинг дастлабки 9 ойи ҳисоби бўйича 29,3 миллиард долларни ташкил қилди, деб хабар беради Марказий банк. Йил бошига нисбатан у 19,7 фоизга ёки 4,8 миллиард долларга ошган.
«Ушбу жараён COVID-19 вирусининг тарқалиши оқибатида юзага келган инқирознинг ижтимоий-иқтисодий таъсирини юмшатиш учун ҳамда ҳудудлар ва иқтисодиёт тармоқларини ривожлантириш бўйича давлат дастурларини молиялаштириш учун янги қарзларнинг жалб қилиниши билан изоҳланиши мумкин», — дейилади ҳисоботда.
Шунингдек, ўрганилаётган давр мобайнида давлат ташқи қарзи бўйича 454,8 миллион доллар миқдордаги асосий қарз ва 263,4 миллион доллар миқдордаги фоиз тўловлари амалга оширилган.
Хусусий ташқи қарз тўловлари асосий қарз бўйича 1,3 миллиард доллар ва фоиз тўловлари бўйича 242,1 миллион долларни ташкил қилди. Бунда, асосий қарз ва фоизлар бўйича тўловларнинг энг катта қисмини ҳанузгача нефть-газ ва энергетика сектори корхоналари ҳамда банклар амалга оширмоқда.
Аввалроқ Ўзбекистоннинг давлат ташқи қарзи 2020 йилнинг 10 ойида 18 фоизга ўсгани тўғрисида хабар берилганди.
Эслатиб ўтамиз, S&P Global Ratings халқаро кредит рейтинг агентлиги Ўзбекистоннинг узоқ ва қисқа муддатли суверен кредит рейтинги бўйича навбатдаги ҳисоботини эълон қилди. Унга кўра, Ўзбекистон суверен кредит рейтинги «BB-» даражасида сақлаб қолинган, бироқ келгуси давр учун «салбий» прогноз берилган. Ушбу прогноз ҳукуматнинг ташқи қарзи тез суръатларда ўсишда давом этиши мумкинлигини акс эттиради.Молия вазирлиги томонидан эълон қилинган «2021 йилги фуқаролар учун бюджет» лойиҳасида Ўзбекистоннинг жами давлат қарзи 2021 йил якунида 28,4 миллиард долларга (ЯИМга нисбатан 44,9 фоиз) етиши прогноз қилинмоқда. Молия вазирлиги эса буни хавфсиз даражада деб ҳисобламоқда.
Изоҳ (0)