Koronavirus pandemiyasi bilan bog‘liq vaziyat tufayli Rossiyada migrantlarning vaqtincha bo‘lish muddati 2021-yil 15-iyungacha uzaytirildi, deb xabar bermoqda “RIA Novosti”.
Qayd etilishicha, bu borada Rossiya prezidenti Vladimir Putinning tegishli farmoni e’lon qilindi.
“Rossiya Federatsiyasi prezidentining 2020-yil 18-apreldagi 274-sonli ‘Rossiya Federatsiyasidagi xorijiy fuqarolar va fuqaroligi bo‘lmagan shaxslarning huquqiy holatini yangi koronavirus infeksiyasi keng tarqalishi xavfi munosabati bilan tartibga solish bo‘yicha vaqtinchalik chora-tadbirlar to‘g‘risida’gi farmoniga quyidagi o‘zgarishlar kiritilsin: a) 1-bandning birinchi xatboshidagi ‘2020-yil 15-dekabrgacha’ degan so‘zlar ‘2021-yil 15-iyunga qadar’ degan so‘zlar bilan almashtirilsin”, — deya qayd etilgan hujjatda.
Hujjatga muvofiq, chet el fuqarolari vaqtincha yashash to‘g‘risidagi hujjatlarni yangilashlari shart emas. Farmon u imzolangan vaqtdan boshlab kuchga kiradi.
Avvalroq Rossiya mamlakatda nolegal bo‘lib turgan o‘zbekistonliklarga 15-dekabrgacha imtiyoz bergani haqida xabar berilgandi.
Izoh (0)