Қашқадарё вилоятининг Қарши туманида сектор раҳбарлари ҳоким Мақсуда Мустафоева бетоблиги сабаб аҳолига ҳокимсиз мурожаатнома йўллади, дея хабар берди «Дарё» мухбири.
Таъкидланишича, 15 декабрь куни Қарши туманида ҳоким Мақсуда Мустафоева раҳбарлигида Халқ депутатлари туман кенгашининг навбатдаги сессияси бўлиб ўтиши ва унда ҳоким бошчилигидаги сектор раҳбарларининг аҳоли ҳамда депутатларга мурожаатномаси эълон қилиниши кутилган. Бироқ сессия бошланса-да, ҳоким кўриниш бермаган.
Сессияга раислик қилган депутат Полвон Тўлиев сессияни очиб, ҳоким Мақсуда Мустафоева бетоблиги сабаб сессияга келолмаганини, шу сабаб ҳоким мурожаатномасини унинг биринчи ўринбосари Сардор Абдуллаев ўқиб эшиттиришини маълум қилган.
Сессия сўнгида туман масъулларига юзланган журналист ва блогерлар ҳоким бетоблиги ва сессияда қатнашолмаслиги туман ҳокимлиги ахборот хизматига аввалдан маълум бўлганми ёки сессия аввалида ошкор бўлдими, деган саволнинг жавоби билан қизиққан.
«Сессияга ҳоким келиши кутилганди. Бироқ дабдурустдан шундай бўлиб қолди. Лекин бу воқеадан туман ҳокимлиги ахборот хизматининг хабари бор эди», — деди вазиятни изоҳлаган ҳоким ўринбосари Сардор Абдуллаев.
Ҳокимлик ахборот хизмати раҳбари Али Эргашев эса ҳолат аввалдан унга маълум бўлса-да, ҳоким йўқ пайтда унинг ваколатларини бажариш биринчи ўринбосар зиммасидаги масала бўлгани учун мурожаатнома эълон қилинаётган пайтда ҳоким иштирок этмаслигини жамоатчиликка маълум қилмаганини билдирди.
Эслатиб ўтамиз, айни кунга қадар вилоятда Қарши ва Шаҳрисабз шаҳри, Деҳқонобод, Ғузор, Қамаши, Чироқчи, Яккабоғ, Нишон ва Муборак тумани ҳокимлари бошчилигидаги сектор раҳбарлари аҳолига мурожаатнома йўллаб, 2020 йилда амалга оширилган ишлар ҳисоботи ҳамда 2021 йилда қилиниши лозим бўлган режалар ҳақида маълумот берди. Қарши туманидаги ҳолат вилоятда ҳокимсиз мурожаатнома йўлланган биринчи ҳолат ҳисобланади.
Изоҳ (0)