Тиббиёт муассасаларида сув таъминоти йўқлиги туфайли 1,8 миллиард киши COVID-19 ва бошқа юқумли касалликлар билан касалланиши мумкин. Бу ҳақда Жаҳон соғлиқни сақлаш ташкилоти ва БМТнинг Болалар жамғармаси (UNISEF) ҳисоботида келтирилган.
Ташкилот маълумотларига кўра, ҳар тўртинчи тиббиёт муассасасида сув таъминоти тизими, ҳар учинчисида эса қўллар учун зарур гигиена воситалари мавжуд эмас.
«Тиббий муассасада ҳамшира ва шифокорларнинг сувсиз, санитария ва гигиенасиз ишлаши шахсий ҳимоя воситаларисиз ишлаш билан тенгдир», — деган ЖССТ раҳбари Тедрос Гебрейесус.
У коронавирусга қарши курашда сув таъминоти, санитария ва гигиена муҳим аҳамиятга эга эканлигини таъкидлаб, «бу борада ҳали ҳам жиддий бўшлиқлар борлиги»ни қўшимча қилган.
Бу вазият дунёнинг энг кам ривожланган 47 давлатида, айниқса, аянчли эканлигини, тиббиёт муассасаларида сув таъминотини яхшилаш учун ушбу мамлакат фуқароларининг ҳар бирига 1 доллар миқдорида инвестиция зарурлигини билдирган. Касалхона ва клиникаларда гигиенани яхшилаш учун маблағ киритиш соғлиқни сақлаш тизими харажатларини камайтиришга, тиббиёт ходимларининг сув қидириш учун кетказадиган вақтини қисқартиришга, шунингдек, аҳолининг заиф қатлами, ҳомиладор аёллар ва болалар учун кўрсатиладиган хизмат сифатини сезиларли даражада оширишга ёрдам беради.
Вирус тарқалишини реал вақт режимида кузатиб келаётган Жонс Ҳопкинс университети маълумотига кўра, айни пайтда дунёда коронавирусга чалинганлар сони 72 миллион кишидан ошган.
Изоҳ (0)