Амударё устида Хоразмни Қорақалпоғистон билан боғлайдиган 413 метрлик кўприк, шунингдек, Қораўзак туманидан Шовот туманигача 79 километрлик темир йўл қурилиши режалаштирилмоқда. Бу ҳақда 13 декабрь куни Шавкат Мирзиёев раислигида Хоразм вилояти фаоллари ва тармоқлар мутасаддилари иштирокида ташкил этилган йиғилишда маълум бўлганди.
Бундан ташқари, келгуси уч йилда 2370 километр ички йўллар таъмирланиши кутилмоқда.
«Gazeta.uz»нинг ёзишича, «Ўзбекистон темир йўллари» акциядорлик жамияти раиси Ҳусниддин Ҳосилов «Ўзбекистон 24» телеканалига берган интервьюсида Амударё устида қуриладиган 413 метрлик кўприкда автомобиль ва темир йўл биргаликда ўтишини маълум қилган. Унинг сўзларига кўра, янги кўприк йўлни 240 километрга, ташилаётган юкларнинг манзилга етиб бориш вақтини 6 соатга қисқартиради. Бундан ташқари, ушбу кўприк орқали ўтаётган юкларнинг йиллик самараси 150 миллиард сўмга яқин бўлиши кутилмоқда.
«Хоразм вилояти ва Қорақалпоғистон ўртасидаги темир йўл орқали ташилаётган юкларнинг ўртача ҳажми 12 миллион тоннани ташкил қилаётган бўлса, кўприк ҳамда темир йўл қурилганидан кейин юклар ҳажми лойиҳанинг ўзини оқлаш муддатига етиб боргунга қадар 20-25 миллион тонна атрофида бўлади», — деган у.
«Ўзбекистон темир йўллари» раҳбарининг сўзларига кўра, Президент ушбу қурилишни январь ойидан бошлаш ҳақида топшириқ берди ва бунинг учун зарур бўлган маблағни ҳам ажратди.
Мавзуга доир: Хоразмда 2021 йилда 100 та кўп қаватли уй қурилади
Изоҳ (0)