Shavkat Mirziyoyev 13-dekabr, yakshanba kuni Urganch shahrining Xonqa ko‘chasida bunyod etilayotgan ko‘p qavatli uylarni borib ko‘rdi.
Prezident matbuot xizmatining xabar berishicha, bu yerda har biri 54 kvartirali to‘rtta 9 qavatli turar joy qurilmoqda. Monolit usulida, energiyatejamkor qurilish materiallaridan foydalangan holda bunyod etilmoqda. Xonadonlar tayyor holda topshiriladi. Yaqin oylarda bu yerga aholi ko‘chib kelib, hudud zamonaviy mavzelardan biriga aylanadi.
Davlat rahbari uyning shourumini kirib ko‘rdi. Mebellar, muhandislik tarmoqlarining sifatiga e’tibor qaratdi. Ko‘p qavatli uylarga malakali xizmat ko‘rsatishni yo‘lga qo‘yish bo‘yicha ko‘rsatma berildi.
Qayd etilishicha, shu yerda Xorazmda amalga oshiriladigan bunyodkorlik ishlari, xususan, Urganch shahridagi “Binary” xalqaro universiteti uchun yangi bino barpo etish, avtomobil yo‘llarini ta’mirlash, ko‘prik qurish, kommunal xizmatlarni yaxshilash bo‘yicha loyihalar taqdimoti o‘tkazildi.
Shu bilan davlat rahbarining Xorazm viloyatiga 2 kunlik tashrifi yakunlandi.
Eslatib o‘tamiz, Shavkat Mirziyoyevning Xorazm viloyatiga tashrifi 12-dekabr kuni boshlangan edi. Safar davomida qishloq xo‘jaligi va sanoat korxonalari faoliyati bilan tanishdi. Xususan, Xonqa tumanidagi beshinchi avlod texnologiyasiga ega zamonaviy issiqxonani, Urganchdagi texnoparkni borib ko‘rdi, Yangiariq tumanidagi Yan Tex Invest mas’uliyati cheklangan jamiyat faoliyati bilan tanishdi, Xorazmda ishlab chiqarilayotgan sanoat mahsulotlarini ko‘zdan kechirdi.
13-dekabr kuni Xorazm viloyati faollari va tarmoqlar mutasaddilari ishtirokida tashkil etilgan yig‘ilishda viloyatdagi ijtimoiy-iqtisodiy masalalar tanqidiy ko‘rib chiqildi. Yig‘ilishda Prezident Xorazmning marrasi baland bo‘lishi kerakligini, balandparvoz gaplar bilan iqtisodiyotni yuritib bo‘lmasligini ta’kidlab, Xorazmdagi hokimlar bilan gaplashib, qancha pul so‘rasa, berganini bildirdi.
Izoh (0)