Xorazmning marrasi baland bo‘lishi kerak. Bu haqda Prezident Shavkat Mirziyoyev 13-dekabr, yakshanba kuni Xorazm viloyati faollari bilan bo‘lib o‘tgan yig‘ilishda ta’kidlab o‘tdi.
Yig‘ilishda dolzarb ijtimoiy-iqtisodiy masalalar muhokama qilindi. Har bir shahar va tuman, mahallalarda mavjud imkoniyatlardan kelib chiqib, “o‘sish nuqtalari” belgilandi.
Xususan, Urganch shahrida to‘qimachilik va turizm, Xiva shahrida turizm va qurilish materiallari, Gurlan tumanida to‘qimachilik va issiqxona xo‘jaligi, Yangibozor tumanida issiqxona va meva-sabzavotni qayta ishlash, Tuproqqal’a tumanida mashinasozlik va elektr texnikasi kabi yo‘nalishlarni rivojlantirish mumkinligi qayd etildi.
Shu yo‘nalishlarda ishlab chiqilgan loyihalarni amalga oshirish uchun har bir hududga vazirlik va banklar rahbarlari biriktirildi. Barcha loyihalar 16 mingdan ziyod ish o‘rni tashkil etish imkonini beradi.
2021-yilda viloyatda oilaviy tadbirkorlikni rivojlantirish, yoshlar va ayollar bandligini oshirish maqsadlariga 500 milliard so‘m kredit resursi ajratilishi ma’lum qilindi.
Xorazm uchun drayver sohalardan biri turizm bo‘lgani uchun viloyatda mehmonxona o‘rinlarini ko‘paytirish, salohiyatli mamlakatlardan Urganchga doimiy va charter reyslar tashkil etish zarurligi ta’kidlandi.
Ichki turizmni rivojlantirish uchun transport xizmatlarini yaxshilash, xususan, Farg‘ona vodiysidan avia va temiryo‘l qatnovini yo‘lga qo‘yib, buning dastlabki davrida 30 foizlik chegirma qo‘llash bo‘yicha ko‘rsatma berildi. Keyinchalik bu tajriba Termiz, Samarqand va Buxoro shaharlari bo‘yicha ham qo‘llaniladi.
“Qiyin davrda, murakkab sharoitda yashayapmiz. Ana shu sharoitda har bir tuman, har bir mahallaning o‘z o‘rni, marralari bor. Xorazmning marrasi baland bo‘lishi kerak”, — degan davlat rahbari.
Avvalroq Xorazmdagi faollar yig‘ilishi davomida Prezident “mahalla raisi — islohotchi” tamoyili asosida ijtimoiy muammolarni hal qilish bo‘yicha yangi tizim joriy etilishini e’lon qilgani haqida xabar berilgan edi.
Shavkat Mirziyoyev 12-dekabrdan buyon Xorazm viloyatida tashrif bilan bo‘lib turibdi. Qayd etish joiz, davlat rahbari 2020-yil mart oyida ham viloyatda bo‘lib, hududdagi yangi to‘qimachilik korxonasi, “Hazorasp” erkin iqtisodiy zonasi, Yangiariq tumanidagi zamonaviy issiqxona, Ichanqal’ada amalga oshiriladigan turizm loyihalari, Prezident maktabi, Jaloliddin Manguberdi memorial bog‘i bilan tanishgan, faollar yig‘ilishida qatnashgan edi.
Izoh (0)