Oltiariq hokimi paxta terimiga jalb etilgan 1-sinf o‘quvchilarini maktabga qaytarib yuborgani haqida gapirib berdi

Oltiariq tumani hokimi Xolmirza Niyozov jamoatchilikka murojaati doirasida jurnalistlar bilan bo‘lib o‘tgan uchrashuvda bundan 16 yil avval, Buvayda hokimi sifatida faoliyat olib borayotgan vaqtida 1-sinf o‘quvchilari ham paxta terimiga jalb etilganini eslatib o‘tdi. Bu haqda “Xabar.uz” xabar bermoqda.

2004-yilning 27-oktabrida bo‘lgan bir voqeani aytib bersam. Tuman hokimi sifatida ish boshlagandim. Yo‘lning chetida kolonna bo‘lib ketayotgan bolachalarni ko‘rib, mashinani to‘xtatdim.

Surishtirsam, 1-sinf bolachalarini paxta terishga olib ketishayotgan ekan. Har bir sinfga 30 kilogrammdan reja qo‘yilibdi. O‘sha vaqtning o‘zida hammasini maktabga qaytarib yubordim. Paxta dalasiga esa g‘o‘zapoya o‘radigan texnika kiritvordim.

Xolmirza Niyozov, Oltiariq tumani hokimi

“Maktablarda suv bo‘lmasdi, oddiy narsalarni ham talab qila olishmasdi. Nihoyat Prezident talabi bilan bu narsalarga chek qo‘yildi. Endi bolalarimiz faqat o‘qish bilan band. O‘ylaymanki, bu narsa yaqin vaqtlarda o‘z natijasini beradi”, — deya qo‘shimcha qilgan Oltiariq tumani hokimi Xolmirza Niyozov.

Ma’lumot uchun, asli Farg‘ona viloyatining Qo‘shtepa tumanidan bo‘lgan 55 yoshli Xolmirza Niyozov (Toshkent irrigatsiya va qishloq xo‘jaligini mexanizatsiyalash muhandislari institutining 1990-yilgi bitiruvchisi) ko‘p yillar Farg‘ona viloyati yer resurslari va davlat kadastri boshqarmasi boshlig‘i, Farg‘ona viloyati qishloq va suv xo‘jaligi boshqarmasi boshlig‘i va viloyatdagi boshqa tashkilotlarda mas’ul lavozimlarda ishlagan. 2004—2007-yillarda Farg‘ona viloyati Buvayda tumaniga hokimlik qilgan. 2016-yil 1-dekabrdan Oltiariq tumani hokimi lavozimida mehnat qilmoqda.