Buxoro viloyatining Qorovulbozor tumanida poyezd va Nexia avtomobilining to‘qnashuvi oqibatida ikki fuqaro vafot etgan. Bu haqda “Daryo”ga viloyat IIB YHXB axborot xizmati rahbari Ulug‘bek Shukrullayev xabar berdi.
Ta’kidlanishicha, avtohalokat Qorovulbozor tumanidagi Buxoro neftni qayta ishlash zavodi tasarrufidagi ichki xo‘jalik avtomobil yo‘lining Qorovulbozor razyezdi 144-sonli bekatlar oralig‘i 4000-kilometridagi temiryo‘lning qo‘riqlanmaydigan kesishmasida sodir bo‘lgan.
Korxona tomon yo‘lga chiqqan oq rangli Nexia haydovchisi R.J. yaqinlashib kelayotgan poyezdni ko‘rsa-da, temiryo‘l kesishmasidan tezroq o‘tib ketishni ko‘zlagan va temiryo‘lning qatnov qismiga chiqib ketgan. Natijada teplovozning old qismi Nexia’ning chap tomoniga urilgan. Oqibatda avtomashina haydovchisi R.J. hamda old o‘rindiqda o‘tirgan yo‘lovchi Sh.N. og‘ir tan jarohati olib, voqea joyida vafot etgan.
Mazkur hodisa viloyat IIB YHXB boshlig‘i, viloyat IIB tergov boshqarmasi, tergov-tezkor guruhi xodimlari hamda tegishli mutasaddi tashkilotlar vakillari ishtirokida o‘rganilgan. O‘rganuvga ko‘ra, hodisa joyida yo‘l yotiq chiziqlari mavjudligi, to‘xtov belgisi to‘liq o‘rnatilgani, bir izli temiryo‘l kesishmasi, 1/3-1 yo‘l belgisi mavjudligi hamda temiryo‘l ustki qismlari soz holatdaligi aniqlangan.
“Ushbu hodisa sodir bo‘lgan temiryo‘l kesishmasiga olib boruvchi ichki xo‘jalik yo‘li Buxoro neftni qayta ishlash zavodi tomonidan qo‘riqlanadigan hudud sanaladi. Shu bois, bu yerda har bir transport vositasi hamda fuqarolarning kirib-chiqishi uchun blokpost tashkil etilgan. Ushbu hududga faqat mazkur korxonada ishlovchi xodimlarga tegishli bo‘lgan transport vositalari maxsus ruxsatnoma asosida kirib-chiqishi mumkin. O‘rnatilgan videokameralar kuzatilganda, baxtsiz hodisa ham aynan shu korxona ishchilari bilan sodir bo‘lgani aniqlandi”, — dedi Ulug‘bek Shukrullayev.
Ma’lum qilinishicha, Vazirlar Mahkamasining 2011-yil 15-noyabrdagi qaroriga muvofiq, atrofi o‘ralgan hududlar, qo‘riqlanadigan va kirish ruxsatnoma orqali amalga oshiriladigan tashkilotlarning ichkarisida sodir bo‘ladigan holatlar yo‘l transport hodisasi sifatida statistika hisobiga olinmasligi ko‘rsatib o‘tilgan.
Eslatib o‘tamiz, avvalroq Surxondaryo viloyati Muzrabod tumanida teplovoz temiryo‘l kesishmasiga chiqib qolgan Matiz avtomobilini urib yuborishi oqibatida haydovchi halok bo‘lgani xabar berilgandi.
Izoh (0)