Олтиариқ ҳокими пахта теримига жалб этилган 1-синф ўқувчиларини мактабга қайтариб юборгани ҳақида гапириб берди

Олтиариқ тумани ҳокими Холмирза Ниёзов жамоатчиликка мурожаати доирасида журналистлар билан бўлиб ўтган учрашувда бундан 16 йил аввал, Бувайда ҳокими сифатида фаолият олиб бораётган вақтида 1-синф ўқувчилари ҳам пахта теримига жалб этилганини эслатиб ўтди. Бу ҳақда «Xabar.uz» хабар бермоқда.

2004 йилнинг 27 октябрида бўлган бир воқеани айтиб берсам. Туман ҳокими сифатида иш бошлагандим. Йўлнинг четида колонна бўлиб кетаётган болачаларни кўриб, машинани тўхтатдим.

Суриштирсам, 1-синф болачаларини пахта теришга олиб кетишаётган экан. Ҳар бир синфга 30 килограммдан режа қўйилибди. Ўша вақтнинг ўзида ҳаммасини мактабга қайтариб юбордим. Пахта даласига эса ғўзапоя ўрадиган техника киритвордим.

Холмирза Ниёзов, Олтиариқ тумани ҳокими

«Мактабларда сув бўлмасди, оддий нарсаларни ҳам талаб қила олишмасди. Ниҳоят Президент талаби билан бу нарсаларга чек қўйилди. Энди болаларимиз фақат ўқиш билан банд. Ўйлайманки, бу нарса яқин вақтларда ўз натижасини беради», — дея қўшимча қилган Олтиариқ тумани ҳокими Холмирза Ниёзов.

Маълумот учун, асли Фарғона вилоятининг Қўштепа туманидан бўлган 55 ёшли Холмирза Ниёзов (Тошкент ирригация ва қишлоқ хўжалигини механизациялаш муҳандислари институтининг 1990 йилги битирувчиси) кўп йиллар Фарғона вилояти ер ресурслари ва давлат кадастри бошқармаси бошлиғи, Фарғона вилояти қишлоқ ва сув хўжалиги бошқармаси бошлиғи ва вилоятдаги бошқа ташкилотларда масъул лавозимларда ишлаган. 2004—2007 йилларда Фарғона вилояти Бувайда туманига ҳокимлик қилган. 2016 йил 1 декабрдан Олтиариқ тумани ҳокими лавозимида меҳнат қилмоқда.