Finlyandiyaning Eurayoki shahrida joylashgan Olkilouto atom elektr stansiyasida 10-dekabr kuni yuz bergan shtatdan tashqari hodisa sababli stansiya ichida radiatsiya darajasi ko‘tarildi. Bu haqda “Interfaks” xabar berdi.
“Shtatdan tashqari holat radiatsion monitoring tizimi stansiya ichida radiatsiyaning yuqori darajasini aniqlagani bilan bog‘liq”, — deya ma’lum qilgan Yadro va radiatsion xavfsizlik markazi bosh direktori Petteri Tiyppana.
Uning so‘zlariga ko‘ra, stansiyaga tutash hududlarda yashaydigan aholining xavfsizligiga tahdid yo‘q, ular xavfsiz holatda.
Markaz rahbarining ma’lum qilishicha, stansiyada zudlik bilan eng yuqori himoya choralari ko‘rilgan. Shtatdan tashqari holatni ko‘rsatgan reaktorda favqulodda avtomatik o‘chirish amalga oshirilgan.
“Hozirgi paytda obyekt barqaror va xavfsiz holatda. Kun davomida radiatsiya darajasining ko‘tarilishi qayta kuzatilmadi, biroq hozircha nima sababdan obyektda radiatsiya ko‘tarilgani noma’lum”, — dedi Tiyppan.
AESga egalik qiluvchi Teollisuuden Voima kompaniyasining bosh direktori Yarmo Tanxuaning ma’lum qilishicha, favqulodda holat reaktorning odatda radiatsiya yuqori bo‘ladigan binosi ichida yuz bergan, shu sababli ishchilar u binoga hech qachon kirmaydi. “Shu sababli hodisa ular uchun xavf tug‘dirmaydi”, — deb hisoblaydi Tanxua.
U gap reaktor suvini tozalovchi filtratsiya tizimi haqida ketayotgan bo‘lishi mumkinligini istisno qilmagan. Radiatsion suvning bir qismi reaktorga tushgan va shu sababli halokat signali ishlab ketgan bo‘lishi mumkin.
Tanxua hozircha stansiya ichida radiatsiya qanchalik ko‘tarilganini ayta olmagan. Uning so‘zlariga ko‘ra, “bu AES tarixidagi yagona holat, avval stansiyada bunga o‘xshash holat yuz bermagan”.
Izoh (0)