Францияда 15 декабрдан комендантлик соати жорий қилинади

Франция бош вазири Жан Кастекс мамлакатда 15 декабрдан комендантлик соатини эълон қилди, у соат 20:00 дан соат 06:00 гача амал қилади, деб ёзади «РБК» ҳукумат раҳбари Twitter’ига таяниб.

Кастекс матбуот анжуманида маълум қилишича, комендантлик соати Янги йил кечаси ҳам кучда бўлади.

Кинотеатр, театр ва музейлар режалаштирилганидек 15 декабрь куни очилмайди, балки яна уч ҳафтага — камида 7 январгача ёпиқ бўлади, деди бош вазир. Унинг сўзларига кўра, францияликлар комендантлик соати амал қиладиган тунги вақтдан ташқари бошқа пайтларда мамлакат бўйлаб бемалол ҳаракатланиши мумкин. Бундан ташқари, у қаерда бунинг имкони бўлса, масофадан ишлашни сақлаб қолишни таклиф қилди. Бар ва ресторанлар ҳам ёпиқлигича қолади.

Франция ички ишлар вазири Жеральд Дарманен аниқлик киритишича, комендантлик соати мамлакатнинг денгиз ортидаги ҳудудларига тегишли бўлмайди.

Сўнгги маълумотларга кўра, Францияда 2,3 миллион киши коронавирусга чалинган, 56,9 мингдан ортиқ бемор вафот этган.

Ноябрь охирида Франция президенти Эммануэль Makroн коронавирус инфекцияси туфайли жорий қилинган чекловлар босқичма-босқич бекор қилина бошлашини эълон қилган эди. 28 ноябрдан мамлакатда дўконлар очилиши, шунингдек, фуқаролар очиқ ҳавода спорт билан шуғулланиши ва кўпи билан 30 кишилик диний тадбирларга бориши мумкин бўлиши керак эди.

Агар мамлакатдаги эпидемиологик вазият яхшиланса ва реанимациядагилар сони 2,5—3 минг кишидан ошмаса, ўзини ўзи яккалаш режими 15 декабрдан бекор қилиниши керак эди. Кинотеатрлар, театрлар ва музейлар очилиши, шунингдек, бино ичидаги тадбирларга рухсат берилиши кутилаётган эди. Айни вақтда соат 21:00 дан соат 07:00 гача комендантлик соати жорий этилиши, фақат Рождество ва Янги йил арафасида — 24 декабрь ва 31 декабрь кунлари истисно қилиниши режалаштирилган эди.

Октябрь охирида карантин ҳақида мамлакат президенти Эммануэль Makroн эълон қилган эди. У оммавий тадбирлар бекор қилиниши, кўп сонли одамлар тўпланадиган жойлар, хусусан, бар ва ресторанлар ёпилиши, бунинг имконияти бўлган барча корхоналарда масофадан ишлаш формати жорий этилишини айтганди. Шундан сўнг 30 октябрдан 1 декабргача умумий карантин жорий қилинди. Улгуржи савдо муассасалари, мактаблар ва мактабгача таълим муассасалари, мактабдан ташқари машғулотлар ўтказувчи муассасалар, меҳмонхоналар, барча соғлиқни сақлаш муассасалари, жамоат транспорти ўз ишини давом эттиради.

6 ноябрдан эса Парижда COVID-19 туфайли тунда озиқ-овқат етказиб бериш ва спиртли ичимликлар сотиб олиш тақиқланди.