Samarqand viloyatining Pastdarg‘om tumanida yashovchi ota to‘rt nafar voyaga yetmagan farzandiga to‘lanishi lozim bo‘lgan 42 million so‘m aliment pulini bir vaqtning o‘zida to‘lab berdi. Bu haqda “Daryo”ga MIB Pastdarg‘om tuman bo‘limi ma’lum qildi.
Qayd etilishicha, Fuqarolik ishlari bo‘yicha Pastdarg‘om tumanlararo sudining qarori bilan fuqaro R.T.dan undiruvchi Sh.N.ning to‘rt nafar voyaga yetmagan farzandining moddiy ta’minoti uchun oylik daromadining ikkidan bir qismi miqdorida aliment undirib borish belgilangan.
Bu holat bo‘yicha MIB Pastdarg‘om tuman bo‘limi tomonidan ijro ishi yuritilgan bo‘lishiga qaramasdan, fuqaro R.T. aliment to‘lovlarini to‘lamay kelgan.
MIB Pastdarg‘om tuman bo‘limi xodimlari tomonidan qarzdor R.T. bilan atroflicha suhbat va tushuntirish ishlari o‘tkazilib, bugungi sinov kunlarida farzandlarini moddiy qo‘llab-quvvatlash har bir otaning burchi ekani tushuntirilgan.
Olib borilgan tushuntirish va profilaktik tadbirlardan o‘ziga to‘g‘ri xulosa chiqargan ota farzandlari ta’minotini o‘ylab 42 million so‘m pulni birdaniga to‘lab bergan.
Izoh (0)