АҚШда Pfizer вакцинаси синовларида 6 нафар кўнгилли вафот этган

Американинг Pfizer ва Германиянинг BioNTech компанияси ҳамкорликда ишлаб чиққан вакцина синовларини ўтказиш чоғида олти киши вафот этган. Бу ҳақда «РБК» АҚШ Озиқ-овқатлар ва дорилар сифати масалалари бўйича бошқармаси (FDA) томонидан эълон қилинган ҳужжатга таяниб хабар берди.

«Ҳисобот даврида олтита ўлим қайд этилди (вакцина олинаётган гуруҳда иккита, плацебо гуруҳида эса тўртта ўлим)», — дейилади FDA’нинг 10 декабрга белгиланган мажлиси учун тайёрланган 53 бетли ҳужжатда.

Унда таъкидланишича, вакцина олаётганлар гуруҳидаги биринчи қурбон атеросклероз ва семизликдан азоб чеккан. Кўнгилли дорининг биринчи дозаси юборилганидан кейин уч кун ўтиб вафот этган. Вакцина олаётганлар гуруҳида вафот этган иккинчи иштирокчида эса иккинчи доза киритилганидан кейин 60 кун ўтиб, юрак тўхтаб қолган, яна уч кундан кейин унинг ўлими қайд этилган.

Плацебо олганлар гуруҳидаги икки киши инсульт ва инфарктдан кўз юмган, синовлар иштирокчиларининг яна икки нафари нимадан вафот этгани ҳозирча номаълум. Олти қурбоннинг уч нафари 55 ёшдан катта бўлган.

FDA хулосасида айтилишича, Pfizer ва BioNTech вакцина сифатини кафолатловчи тегишли ахборотни тақдим этган. Дори биринчи дозадан кейиноқ аҳамиятли ҳимояни таъминлайди, дейилади ҳисоботда, бу эса вакцинани COVID-19’га қарши курашиш учун хавфсиз ва юқори самарали воситага айлантиради.

Июль ойида Pfizer АҚШ ҳукумати билан 50 миллион америкаликни эмлашга етадиган 100 миллион доза (бир кишига иккитадан инъекция) вакцина етказиб бериш учун 1,95 миллиард долларлик шартнома имзолаган. Шартнома дорининг клиник синовлари тугашидан олдинроқ тузилган, фармокологик гигант вакцина самарадорлиги исботланган тақдирдагина партияни етказиб бериши керак эди. Ноябрь ойида Pfizer ва унинг германиялик шериги BioNTech томонидан ишлаб чиқилган вакцина 95 фоиз самарадорлик кўрсатди ва аввалроқ тузилган шартнома ишга солинди. Аммо NYT манбаларининг маълум қилишича, ишлаб чиқарувчилар шартномани имзолаш босқичидаёқ Оқ уйга яна 100 миллионта дозадан иборат қўшимча партияни сотиб олиш имкониятини кўриб чиқишни таклиф қилган. Президент маъмурияти эса бундан воз кечган.

Bloomberg хабарига кўра, АҚШ Pfizer вакцинасидан 600 миллионта дозани олдиндан буюртма қилиб қўйган. Йил охиригача компания 100 миллионта доза ишлаб чиқариши керак эди, аммо унда илк босқичларда хом ашё етказиб бериш билан боғлиқ муаммолар юзага келди, шу сабабли икки марта камроқ доза ишлаб чиқаради.

Pfizer президенти Альберт Бурла вакцинадан йил охиригача 50 миллион, 2021 йилда эса 1,3 миллиард дозагача ишлаб чиқариш режаларини эълон қилди.

Аввалроқ АҚШ аҳолиси COVID-19’га қарши ҳаммадан биринчи бўлиб эмланиши хабар берилган эди. АҚШ президенти Дональд Трамп имзолайдиган фармонга мувофиқ, америкаликлар эмланганидан кейингина коронавирусга қарши вакциналар бошқа мамлакатларга ҳам етказилишни бошлайди.

АҚШ санитар назорат бошқармаси (FDA) 10 декабрь кунги мажлисида Американинг Pfizer ва Германиянинг BioNTech компаниялари вакцинасидан фойдаланишни маъқуллаш-маъқулламаслик масаласини ҳал қилади. Мамлакатда Американинг Moderna компанияси ишлаб чиққан яна бир вакцинани рўйхатдан ўтказиш масаласи эса келаси ҳафта, 17 декабрь куни кўриб чиқилади.