Наманган, Навоий ва Самарқандда сайёр кассалар томонидан пенсия тўловларини кеч тўлаш ҳолатлари аниқланди

Ўзбекистон Молия вазирлиги ҳузуридаги бюджетдан ташқари Пенсия жамғармасига келиб тушган мурожаатлар ўрганилганда АТ «Халқ банки» сайёр кассалари томонидан пенсия тўловларини кеч тўлаш ҳолатлари аниқланган. Бу ҳақда жамғарма матбуот хизмати «Дарё»га маълум қилди.

Хусусан, Наманган вилояти Уйчи туманида истиқомат қилувчи фуқаро 6 ноябрь куни Пенсия жамғармаси «Ишонч телефони»га сентябрь ойи пенсияси берилмаганлиги бўйича мурожаат қилган.

Мурожаат ўрганилганда бир неча фуқароларнинг 2020 йил сентябрь ойи тўлов рўйхатига чиқарилган ва «Халқ банки»нинг сайёр кассаси ходими томонидан 2020 йил сентябрь ойида тўланганлик тўғрисида маълумот киритилган, бироқ тўлаб берилмаган.

Пенсия жамғармасига мурожаат қилганидан кейин фуқаронинг қонуний пенсияси 2020 йилнинг 7 ноябрь куни тўлаб берилиши таъминланган. Шунингдек, Навоий вилояти Хатирчи туманида истиқомат қилувчи фуқарога ҳам «Халқ банки»нинг сайёр кассаси ходими томонидан дастурда тўланди белгисини қўйиб, пенсия пули асоссиз равишда тўлаб берилмаганлиги аниқланган. Пенсия тўловларини кечиктиришга йўл қўйган ходимлар билан меҳнат шартномаси бекор қилинган.

«Бундан ташқари, амалдаги тартибга асосан пенсиялар, нафақалар ва бошқа тўловларни қайдномада кўрсатилмаган шахсларга ишончномасиз топшириш, шунингдек, пенсия ва нафақа олувчиларга улар яшаш жойларидан рўйхатдан чиқарилгандан кейин топшириш, пул-буюм лотереялар ва бошқа маҳсулотларни пенсиялар, нафақалар ва бошқа тўловлар пуллари ҳисобидан сотиш тақиқланади. Бироқ жойларда сайёр касса ходимлари томонидан амалдаги тартибга зид равишда ишончномасиз тўлаш ҳолатлари аниқланмоқда. Бу эса ўз навбатида фуқароларнинг эътирозларига сабаб бўляпти», — дейилади хабарда.

Таъкидланишича, Самарқанд вилояти Тойлоқ туманида истиқомат қилувчи фуқаро Д.Г. октябрь ва ноябрь ойлари пенсияси берилмаганлиги бўйича қилган мурожаатини ўрганиш давомида бир неча фуқаронинг октябрь ва ноябрь ойи тўлов рўйхатига чиқарилган ва «Халқ банки»нинг сайёр кассаси ходими томонидан амалдаги тартибда зид равишда ишончномасиз фуқаро Г.Т.га тўлаб берилганлиги аниқланган.

«Пенсия жамғармасига мурожаат қилганидан кейин фуқаронинг қонуний пенсияси тўлаб берилиши таъминланди», — дея қайд этилади хабарда.

Пенсионерга пенсия тўлови кеч тўлаб бериш ва ишончномасиз тўлаш ҳолатлари бўйича Марказий банк ва АТ «Халқ банки» бошқарувига тегишли чора кўриш бўйича хат юборилган.

Аввалроқ Ўзбекистон Бюджетдан ташқари пенсия жамғармаси иш стажини ҳисоблашдаги қўшиб ёзишлар ҳақида маълумот берган эди.