MQKQ vakili: UzAuto Motors monopoliyasini to‘xtatishning bitta yo‘li bor

Monopoliyaga qarshi kurashish qo‘mitasi Toshkent shahar sudi tomonidan 2020-yil 30-oktabrda qabul qilingan hal qiluv qaroriga nisbatan keltirgan apellyatsiya shikoyati rasmiyatchilik uchun qilinayotgani yo‘q. Bu haqda 7-dekabr kuni AOKAda o‘tkazilgan matbuot anjumanida so‘z yuritildi.

“Daryo” muxbiri Mirolim Isajonovning xabar berishicha, tadbirda jurnalistlar tomonidan “Navbatdagi sud jarayonida Monopoliyaga qarshi kurashish qo‘mitasi vakillari faqat g‘urur, aytilgan so‘z uchun qatnashmoqchimi yoki haqiqatan maxsus komissiya chiqargan qarorning haqligini isbotlash uchunmi?”, degan savol berildi. Qo‘mita rasmiylari esa quyidagicha javob qaytardi:

“Sud jarayonidan jamoatchilikning xabari bor. Biz sud chiqargan qarorni hurmat qilamiz va bizning ham mutaxassis sifatida o‘z fikrlarimiz bor. Agar faoliyatimizda o‘zimizdan biror xato topadigan bo‘lsak, har doim ustimizda ishlashga, xatomizni to‘g‘rilashga hamisha tayyormiz. Lekin sud bilan bog‘liq holatda o‘zimiz amalga oshirgan hisob-kitobimizga nisbatan shubhamiz yo‘q, o‘z fikrimizda qolamiz. Sud qarori ustidan berilgan apellyatsiya rasmiyatchilik uchun qilinayotgani yo‘q”, — dedi qo‘mita raisi o‘rinbosari Bekzod Ummatov.

Qo‘mita raisining birinchi o‘rinbosari Bobur Karimovning aytishicha, bozorda raqobatni paydo qilish orqaligina monopoliyaga barham berish mumkin.

UzAuto Motors bilan bog‘liq holatni to‘xtatishning bitta yo‘li bor — kirib kelayotgan avtomobillar uchun bojxona to‘lovini pasaytirish. Agar raqobat bo‘lsa, ularni tekshirishga ham hojat qolmaydi. Raqobatning o‘zi hammasini joy-joyiga qo‘yadi. Agar shu narsa hal bo‘lmasa, UzAuto Motors ishini har yili ko‘rib chiqishimiz, haqligimizni isbotlab, sudda yutishimiz ham mumkin. Biroq bu natija bermaydi, buning asosiy davosi — bozorda raqobatni shakllantirish”, — dedi Karimov.