Монополияга қарши курашиш қўмитаси Тошкент шаҳар суди томонидан 2020 йил 30 октябрда қабул қилинган ҳал қилув қарорига нисбатан келтирган апелляция шикояти расмиятчилик учун қилинаётгани йўқ. Бу ҳақда 7 декабрь куни АОКАда ўтказилган матбуот анжуманида сўз юритилди.
«Дарё» мухбири Миролим Исажоновнинг хабар беришича, тадбирда журналистлар томонидан «Навбатдаги суд жараёнида Монополияга қарши курашиш қўмитаси вакиллари фақат ғурур, айтилган сўз учун қатнашмоқчими ёки ҳақиқатан махсус комиссия чиқарган қарорнинг ҳақлигини исботлаш учунми?», деган савол берилди. Қўмита расмийлари эса қуйидагича жавоб қайтарди:
«Суд жараёнидан жамоатчиликнинг хабари бор. Биз суд чиқарган қарорни ҳурмат қиламиз ва бизнинг ҳам мутахассис сифатида ўз фикрларимиз бор. Агар фаолиятимизда ўзимиздан бирор хато топадиган бўлсак, ҳар доим устимизда ишлашга, хатомизни тўғрилашга ҳамиша тайёрмиз. Лекин суд билан боғлиқ ҳолатда ўзимиз амалга оширган ҳисоб-китобимизга нисбатан шубҳамиз йўқ, ўз фикримизда қоламиз. Суд қарори устидан берилган апелляция расмиятчилик учун қилинаётгани йўқ», — деди қўмита раиси ўринбосари Бекзод Умматов.
Қўмита раисининг биринчи ўринбосари Бобур Каримовнинг айтишича, бозорда рақобатни пайдо қилиш орқалигина монополияга барҳам бериш мумкин.
UzAuto Motors билан боғлиқ ҳолатни тўхтатишнинг битта йўли бор — кириб келаётган автомобиллар учун божхона тўловини пасайтириш. Агар рақобат бўлса, уларни текширишга ҳам ҳожат қолмайди. Рақобатнинг ўзи ҳаммасини жой-жойига қўяди. Агар шу нарса ҳал бўлмаса, UzAuto Motors ишини ҳар йили кўриб чиқишимиз, ҳақлигимизни исботлаб, судда ютишимиз ҳам мумкин. Бироқ бу натижа бермайди, бунинг асосий давоси — бозорда рақобатни шакллантириш», — деди Каримов.
Мавзуга доир:
Изоҳ (0)