Airbnb uy-joy ijara servisi o‘z aksiyalarini birjaga joylashtirgach, ularning narxini har bittasi uchun avval rejalashtirilganidek 44-50 dollar emas, 56-60 dollar deb belgilamoqchi, deb yozadi “Kommersant”. Shu tariqa, kompaniya bahosi ham oshib, 39-42 milliard dollar atrofida bo‘ladi.
Airbnb dekabrdayoq IPO o‘tkazishni rejalashtirmoqda. Bir necha hafta avval servis o‘z moliyaviy ko‘rsatkichlarini e’lon qilgan edi: joriy yilning birinchi uch choragida 696,9 million hajmida sof zarar ko‘rgan, daromad 32 foizga kamayib, 2,52 milliard dollarni tashkil qilgan, ammo uchinchi chorakni kompaniya foyda bilan yakunlagan. IPO o‘tkazish rejalari haqida Airbnb o‘tgan yiliyoq gapirishni boshlagan edi, ammo aksiyalarini birjaga joylashtirishga COVID-19 pandemiyasi xalal berdi.
Dealogic kompaniyasi ma’lumotlariga ko‘ra, joriy yil AQShda IPO bo‘yicha rekord yilga aylanib ulgurgan (bundan avvalgi rekord 1999-yilda qayd etilgan) — yil boshidan buyon kompaniyalar shu tariqa 140 milliard dollardan ortiq mablag‘ jalb qilgan. Dekabr odatda IPO nuqtayi nazaridan eng faol oy hisoblanmaydi, ammo joriy yilda bu oyga boshqa ancha yirik aksiya joylashtiruvlari ham rejalashtirilgan. Shu jumladan, DoorDash taom yetkazib berish onlayn servisi va Roblox o‘yin ishlab chiquvchi kompaniyasi ham IPO o‘tkazadi.
Izoh (0)