Airbnb уй-жой ижара сервиси ўз акцияларини биржага жойлаштиргач, уларнинг нархини ҳар биттаси учун аввал режалаштирилганидек 44-50 доллар эмас, 56-60 доллар деб белгиламоқчи, деб ёзади «Коммерсантъ». Шу тариқа, компания баҳоси ҳам ошиб, 39-42 миллиард доллар атрофида бўлади.
Airbnb декабрдаёқ IPО ўтказишни режалаштирмоқда. Бир неча ҳафта аввал сервис ўз молиявий кўрсаткичларини эълон қилган эди: жорий йилнинг биринчи уч чорагида 696,9 миллион ҳажмида соф зарар кўрган, даромад 32 фоизга камайиб, 2,52 миллиард долларни ташкил қилган, аммо учинчи чоракни компания фойда билан якунлаган. IPО ўтказиш режалари ҳақида Airbnb ўтган йилиёқ гапиришни бошлаган эди, аммо акцияларини биржага жойлаштиришга COVID-19 пандемияси халал берди.
Деалогиc компанияси маълумотларига кўра, жорий йил АҚШда IPО бўйича рекорд йилга айланиб улгурган (бундан аввалги рекорд 1999 йилда қайд этилган) — йил бошидан буён компаниялар шу тариқа 140 миллиард доллардан ортиқ маблағ жалб қилган. Декабрь одатда IPО нуқтаи назаридан энг фаол ой ҳисобланмайди, аммо жорий йилда бу ойга бошқа анча йирик акция жойлаштирувлари ҳам режалаштирилган. Шу жумладан, DoorDash таом етказиб бериш онлайн сервиси ва Roblox ўйин ишлаб чиқувчи компанияси ҳам IPО ўтказади.
Изоҳ (0)