Angliya sharqidagi Norfolk grafligida joylashgan kurka yetishtirish fermasida parranda grippi avj oldi, 30 mingdan ortiq parranda o‘ldirildi. Bu haqda Sun gazetasi atrof-muhitni muhofaza qilish vazirligiga tayanib xabar bermoqda.
O‘tgan hafta Shimoliy Yorkshirdagi fermada ham parranda grippi aniqlangan, shu sababli 10,5 mingta kurka yo‘q qilingan edi.
“Norfolkdagi bu hududda veterinar tekshiruv davom etmoqda, infeksiyaning ehtimoliy manbasini va kasallik qancha vaqtdan buyon saqlanib kelayotganligini aniqlamoqchimiz. Angliyadagi bir nechta parrandachilik fermalarida tasdiqlangan parranda grippi shtammi ayni paytda Yevropada yovvoyi va tutqunlikda saqlanayotgan qushlar orasida aylanayotgan virus bilan yaqin bog‘liqlikka ega bo‘lishi mumkin”, — dedi vazirlik vakili.
Gazeta qayd etishicha, parranda grippining avj olishi va kurkalarning yoppasiga yo‘q qilinishi Rojdestvo arafasida ular oziq-ovqat do‘konlarida tanqis bo‘lib qolishiga olib kelishi mumkin. Chunki kurka britaniyaliklarning Rojdestvo dasturxonidagi eng ommabop taomlardan biridir.
Shuningdek, Yaponiyaning Xirosima prefekturasida ham parranda grippi avj olishi oqibatida kamida 134 mingta kurka yo‘q qilinadi.
Kasallanish o‘chog‘i Mixara shahridagi fermalardan birida qayd etildi. U yerda o‘tgan dam olish kunlari 11 ta tovuq nobud bo‘lgan, mutaxassislar bu parranda grippi tufayli yuz berganini tasdiqlagan. Shu munosabat bilan mahalliy hukumat tovuqlarni yo‘q qilish va hududda sanitar nazoratni ta’minlashni buyurdi.
Bu Xirosimada 2004-yildan buyon parranda grippi aniqlanishi bilan bog‘liq birinchi holatdir.
Avvalroq infeksiya o‘choqlari Yaponiyaning Kagava, Miyadzaki, Nara, Fukuoka, Xyogo prefekturalarida ham qayd etilgan edi. Shu sababli u hududlarda jami 2 milliondan ortiq tovuq yo‘q qilingan.
Eslatib o‘tamiz, Qozog‘iston shimolida yuqori patogenli parranda grippi tarqalgani to‘g‘risida xabar berilgandi. Keyinroq mamlakatning to‘rtta hududida parranda grippi tarqalayotgani rasman tasdiqlangan.
Avvalroq Xitoyda koronavirus epimarkazi yaqinidagi hududda parranda grippi tarqalgani, Saudiya Arabistoni va Vyetnamda yuqori patogenli parranda grippi aniqlangani to‘g‘risida xabar berilgandi.
Izoh (0)