Turkiya turizmi 2020-yilda qay holatda? Turizmni rivojlantirish va targ‘ib qilish agentligi vakili javob berdi

Turkiyaga 2019-yilda 52 million nafar turist tashrif buyurgan bo‘lsa, 2020-yilda pandemiya tufayli oqim ancha kamaydi va keluvchilar soni 15 million nafarga tushgan. Bu haqda Turkiya turizmni rivojlantirish va targ‘ib qilish agentligi boshqaruv a’zosi va matbuot kotibi Erkan Yagdi “Pandemiya sharoitida turizm” loyihasi doirasida o‘zbekistonlik jurnalist va blogerlar bilan matbuot anjumanida aytib o‘tdi.

Pandemiya tufayli turizm sohasi jiddiy zarar ko‘rdi, desam mubolag‘a bo‘lmaydi. Bizda Antaliya, Istanbul, Mug‘la va Izmir eng ko‘p mehmon kutadigan shaharlar sirasiga kiradi. May va iyun oylarida Turkiyada karantin joriy etilgach biz sohamizda sezilarli yo‘qotishlar bo‘lmasligi uchun ancha mehnat qildik. Turistlar mamlakatga xavfsizlikka ishonch bilan kelishlari uchun ishladik. Xususan, Turkiya madaniyat va turizm vazirligi “Xavfsiz turizm sertifikatsiyasi dasturi”ni joriy etdi. Unda sayyoh samolyotdan aeroportgacha, tashish avtotransportidan mehmonxonagacha duch keladigan barcha tafsilotlar va ko‘rilgan xavfsizlik choralarini joyida kuzatish imkoni bor. Ya’ni pandemiya vaqtida mamlakatda ta’til o‘tkazmoqchi bo‘lgan mehmonlar uchun kerak bo‘ladigan eng kichik holatlar ham o‘ylab chiqilgan. Barcha mehmonxonalarda ushbu sertifikat joriy etilishini nazorat qildik. Unda jami 150 ta band bo‘lib, shulardan eng asosiy 3 ta bandni aytib o‘tishim mumkin. Bular: niqob taqish, ijtimoiy masofa saqlash va gigiyenik tozalik. Sertifikat olgan mehmonxonalarni har oyda xalqaro tashkilotlar tekshirib boradi.

Erkan Yagdi, Turkiya turizmni rivojlantirish va targ‘ib qilish agentligi boshqaruv a’zosi va matbuot kotibi 

– Mamlakatingizga kelgan sayyohlar orasida koronavirus infeksiyasini yuqtirganlar bo‘ldimi? Agar bo‘lsa, ularga qanday yordam ko‘rsatildi?– Kelgan sayyohlar orasida virus yuqtirganlar ham bo‘ldi, ammo ularning miqdori ancha kam. Biz mehmonxonalarda ana shunday sayyohlar uchun alohida hududlar tashkil etishni talab qildik. Testi “ijobiy” natija bergan sayyohlarga 15 kun davomida mehmonxonada davolanish uchun sharoit yaratib berildi. Bundan tashqari, sug‘urta paketlari ishlab chiqildi. “COVID-19” testini o‘z ichiga olgan tibbiy sug‘urta paketi tashkil etildi. Unga ko‘ra, shartnoma bilan aeroportlardan olingan aviachiptalar, turli savdo joylari, tur operatorlar va onlayn kanallar orqali xarid qilish mumkin bo‘lgan 15, 19 va 23 yevrolik sug‘urta paketlari doirasida 3 ming, 5 ming va 7 ming yevrogacha barcha tibbiy xarajatlar qoplanadi.

– Pandemiyadagi xarajatlarning o‘sishi hisobiga sayyohlarga ko‘rsatilgan xizmatlar narxi oshdimi?

– To‘g‘ri, turizm sohasida xizmatlarni xususiy sektor amalga oshiradi. Biroq sog‘liqni saqlash tizimining ham bu borada o‘z o‘rni bor. Bizning asosiy maqsadimiz esa insonlar sog‘lig‘ini saqlash. Shu bois narxlar o‘zgartirilmadi.

– Turkiyada yangi turdagi qaysi turizm yo‘nalishlari ishlab chiqilmoqda? Ular orasida sport yo‘nalishlari ham bormi?

– Biz 2023-yilda 75 million nafar sayyoh qabul qilish va xizmat ko‘rsatishni rejalashtirgan edik. Buning uchun sayyohlik yo‘nalishlarini kengaytirish, yirik davlatlardan ko‘proq mehmonlar kelishini ta’minlash va kuchli reklama muhitini yaratishga e’tibor qaratildi. Lekin bu yilgi pandemiya mo‘ljallarimizni o‘zgartirib yubordi. Hozirda bizga kelayotganlarning asosiy qismini Rossiya va Germaniya aholisi tashkil etmoqda.

– Turkiyaga sayohat qilishni istovchilar kun sayin ko‘paymoqda. Shunday ekan, bu borada boshqa davlatlarga investitsiya kiritishga qiziqish qanchalik yuqori?

– Albatta, turizmni rivojlantirish uchun turli davlatlarga pul tikilmoqda. Ayni vaqtda Rossiya, O‘zbekiston va boshqa davlatlarda tur agentliklar faoliyati yo‘lga qo‘yilgan.

Eslatib o‘tamiz, Turkiya prezidenti Rajab Toyyib Erdo‘g‘on 30-noyabr kuni koronavirus tarqalishiga qarshi cheklov choralari kuchaytirilishini ma’lum qilgan, unga ko‘ra, ish kunlari mahalliy vaqt bilan soat 21:00 dan ertalab soat 05:00 gacha mamlakat bo‘ylab amalda bo‘ladigan komendantlik soati kirgan. Dam olish kunlari — juma kuni soat 21:00 dan dushanba kuni ertalab soat 05:00 gacha odamlarning ko‘chaga chiqishi taqiqlanadi.

Bungacha Turkiyada faqat dam olish kunlari komendantlik soati mavjud edi. Rajab Toyyib Erdo‘g‘on 17-noyabr kuni COVID-19 pandemiyasi sababli yangi cheklov choralari joriy etilishini ma’lum qilgandi.