Estoniyada 5-dekabr, shanba kuni koronavirus pandemiyasi sabab qo‘shimcha cheklovlar joriy etildi, deya xabar bermoqda “Interfaks”.
Qayd etilishicha, mamlakatdagi do‘kon va servis xo‘jaliklarining savdo hamda xizmat ko‘rsatish xonalarida bir vaqtning o‘zida ushbu joylar umumiy sig‘imining 50 foizidan ko‘p miqdorda odam bo‘lishi mumkin emas. Shu bilan birga, odamlar “2 + 2” qoidalariga rioya qilishlari kerak. Bunda odamlar maksimal ikkitadan bo‘lib o‘zaro ikki metr masofa saqlab yurishlari kerak.
Umumiy ovqatlanish, ko‘ngilochar va ommaviy tadbirlar o‘tkaziladigan joylarda bo‘lishga soat 22:00 gacha ruxsat beriladi.
Shuningdek, soat 22:00 dan 06:00 gacha umumiy ovqatlanish, ko‘ngilochar va tomoshabinlar uchun statsionar o‘rindiqlar bo‘lmagan ommaviy tadbirlarni o‘tkazish joylari tashrif buyuruvchilar uchun yopiq bo‘lishi kerak. Umumiy ovqatlanish joylari xaridorlarga oziq-ovqat mahsulotlarini sotish yoki oziq-ovqat yetkazib berish uchun kuryerlik va transport xizmatlarini ko‘rsatishga ruxsat beriladi.
Bundan tashqari, yuqoridagi joylarda shaxsiy tadbirlar o‘tkazilishiga yo‘l qo‘yilmaydi. Ijtimoiy va sport tadbirlariga ham xuddi shunday talablar qo‘yiladi.
Ma’lumot uchun, 1,3 million aholiga ega bo‘lgan Estoniyada pandemiya boshlanganidan buyon 5-dekabrgacha 499,5 mingga yaqin koronavirus tahlili uchun test topshirilgan. Ulardan 13 939 tasi (2,8 foizi) musbat natija ko‘rsatgan. So‘nggi 14 kun ichida jami kasallanish 100 ming kishiga 366,37 tani tashkil etdi.
COVID-19 kasalxonalarida 224 kishi davolanmoqda, ulardan 11 nafari sun’iy nafas oldirish uskunasiga ulangan. Pandemiya boshlanganidan beri Estoniyada koronavirus tashxisi qo‘yilgan 125 kishi vafot etgan.
Avvalroq Germaniyada koronavirus bilan bog‘liq cheklovlar 10-yanvargacha uzaytirilishi rejalashtirilayotgani, Latviyada COVID-19 tufayli joriy qilingan favqulodda holat rejimi 11-yanvargacha uzaytirilgani hamda Moskvada koronavirus tufayli cheklov choralari 15-yanvargacha uzaytirilgani haqida xabar berilgandi.
Izoh (0)