Туркияга 2019 йилда 52 миллион нафар турист ташриф буюрган бўлса, 2020 йилда пандемия туфайли оқим анча камайди ва келувчилар сони 15 миллион нафарга тушган. Бу ҳақда Туркия туризмни ривожлантириш ва тарғиб қилиш агентлиги бошқарув аъзоси ва матбуот котиби Эркан Ягди «Пандемия шароитида туризм» лойиҳаси доирасида ўзбекистонлик журналист ва блогерлар билан матбуот анжуманида айтиб ўтди.
Пандемия туфайли туризм соҳаси жиддий зарар кўрди, десам муболаға бўлмайди. Бизда Анталия, Истанбул, Муғла ва Измир энг кўп меҳмон кутадиган шаҳарлар сирасига киради. Май ва июнь ойларида Туркияда карантин жорий этилгач биз соҳамизда сезиларли йўқотишлар бўлмаслиги учун анча меҳнат қилдик. Туристлар мамлакатга хавфсизликка ишонч билан келишлари учун ишладик. Хусусан, Туркия маданият ва туризм вазирлиги «Хавфсиз туризм сертификацияси дастури»ни жорий этди. Унда сайёҳ самолётдан аэропортгача, ташиш автотранспортидан меҳмонхонагача дуч келадиган барча тафсилотлар ва кўрилган хавфсизлик чораларини жойида кузатиш имкони бор. Яъни пандемия вақтида мамлакатда таътил ўтказмоқчи бўлган меҳмонлар учун керак бўладиган энг кичик ҳолатлар ҳам ўйлаб чиқилган. Барча меҳмонхоналарда ушбу сертификат жорий этилишини назорат қилдик. Унда жами 150 та банд бўлиб, шулардан энг асосий 3 та бандни айтиб ўтишим мумкин. Булар: ниқоб тақиш, ижтимоий масофа сақлаш ва гигиеник тозалик. Сертификат олган меҳмонхоналарни ҳар ойда халқаро ташкилотлар текшириб боради.– Мамлакатингизга келган сайёҳлар орасида коронавирус инфекциясини юқтирганлар бўлдими? Агар бўлса, уларга қандай ёрдам кўрсатилди?– Келган сайёҳлар орасида вирус юқтирганлар ҳам бўлди, аммо уларнинг миқдори анча кам. Биз меҳмонхоналарда ана шундай сайёҳлар учун алоҳида ҳудудлар ташкил этишни талаб қилдик. Тести «ижобий» натижа берган сайёҳларга 15 кун давомида меҳмонхонада даволаниш учун шароит яратиб берилди. Бундан ташқари, суғурта пакетлари ишлаб чиқилди. «COVID-19» тестини ўз ичига олган тиббий суғурта пакети ташкил этилди. Унга кўра, шартнома билан аэропортлардан олинган авиачипталар, турли савдо жойлари, тур операторлар ва онлайн каналлар орқали харид қилиш мумкин бўлган 15, 19 ва 23 евролик суғурта пакетлари доирасида 3 минг, 5 минг ва 7 минг еврогача барча тиббий харажатлар қопланади.Эркан Ягди, Туркия туризмни ривожлантириш ва тарғиб қилиш агентлиги бошқарув аъзоси ва матбуот котиби
– Пандемиядаги харажатларнинг ўсиши ҳисобига сайёҳларга кўрсатилган хизматлар нархи ошдими?
– Тўғри, туризм соҳасида хизматларни хусусий сектор амалга оширади. Бироқ соғлиқни сақлаш тизимининг ҳам бу борада ўз ўрни бор. Бизнинг асосий мақсадимиз эса инсонлар соғлиғини сақлаш. Шу боис нархлар ўзгартирилмади.
– Туркияда янги турдаги қайси туризм йўналишлари ишлаб чиқилмоқда? Улар орасида спорт йўналишлари ҳам борми?
– Биз 2023 йилда 75 миллион нафар сайёҳ қабул қилиш ва хизмат кўрсатишни режалаштирган эдик. Бунинг учун сайёҳлик йўналишларини кенгайтириш, йирик давлатлардан кўпроқ меҳмонлар келишини таъминлаш ва кучли реклама муҳитини яратишга эътибор қаратилди. Лекин бу йилги пандемия мўлжалларимизни ўзгартириб юборди. Ҳозирда бизга келаётганларнинг асосий қисмини Россия ва Германия аҳолиси ташкил этмоқда.
– Туркияга саёҳат қилишни истовчилар кун сайин кўпаймоқда. Шундай экан, бу борада бошқа давлатларга инвестиция киритишга қизиқиш қанчалик юқори?
– Албатта, туризмни ривожлантириш учун турли давлатларга пул тикилмоқда. Айни вақтда Россия, Ўзбекистон ва бошқа давлатларда тур агентликлар фаолияти йўлга қўйилган.
Эслатиб ўтамиз, Туркия президенти Ражаб Тоййиб Эрдўғон 30 ноябрь куни коронавирус тарқалишига қарши чеклов чоралари кучайтирилишини маълум қилган, унга кўра, иш кунлари маҳаллий вақт билан соат 21:00 дан эрталаб соат 05:00 гача мамлакат бўйлаб амалда бўладиган комендантлик соати кирган. Дам олиш кунлари — жума куни соат 21:00 дан душанба куни эрталаб соат 05:00 гача одамларнинг кўчага чиқиши тақиқланади.
Бунгача Туркияда фақат дам олиш кунлари комендантлик соати мавжуд эди. Ражаб Тоййиб Эрдўғон 17 ноябрь куни COVID-19 пандемияси сабабли янги чеклов чоралари жорий этилишини маълум қилганди.
Изоҳ (0)