Amerikaning Eat Just kompaniyasi dunyoda birinchi bo‘lib suniy go‘sht sotish ruxsatini olgan kompaniya bo‘ldi, deb xabar bermoqda Reuters. U ruxsatni Singapur oziq-ovqat idorasidan (SFA)dan olgan. Endilikda kompaniya AQShda ham shunday ruxsatnoma olishga erishmoqchi.
Kompaniya yaqin kelajakda Singapur restoranlariga laboratoriyada yetishtirilgan tovuq go‘shtini GOOD Meat brendi ostida sotishni boshlaydi. Keyinchalik bunday go‘sht chakana savdoda sotila boshlanadi.
“Kelib tushgan takliflarni baholash va ularning xavfsizligini aniqlashdan so‘ng Amerikaning Eat Just kompaniyasiga Singapurda sun’iy yetishtirilgan tovuq go‘shtini sotishga ruxsat berishga qaror qilindi”, — deyiladi xabarda. Shu bilan birga, tashkilot rahbari Tan Li Kimning ta’kidlashicha, “xodimlar xavfsizlikni baholashda davom etadi, mutaxassislar bilan keyingi maslahatlashuvlarni o‘tkazadi va bozorga bevosita kelib tushgan yangi mahsulotlarni kuzatadi”.
Shuningdek, Eat Just vakillari “laboratoriyada ishlab chiqarilgan go‘sht mikroblarning tarkibi jihatidan ancha toza” ekanligini bildirgan. “Shuningdek, o‘tkazilgan tahlillar uning tarkibida oqsil, turli xil aminokislota, foydali yog‘lar va minerallar ko‘proq ekanligini ko‘rsatdi”, — deyiladi kompaniya xabarida.
Sun’iy go‘sht laboratoriyalarda hayvon hujayralaridan yaratiladi. Yaratilish jarayonida birorta jonivor ham nobud bo‘lmaydi. Olimlar hayvon hujayralarini har xil usulda olishi mumkin, ulardan biri biopsiya. Keyin hujayralar bioreaktorga joylashtiriladi va oqsillar, aminokislotalar, minerallar, shakar, tuz va boshqa oziq moddalar aralashmasi bilan oziqlantiriladi. Eat Just vakillarining so‘zlariga ko‘ra, kompaniya mutaxassislari kerakli natijaga erishishdan oldin sun’iy go‘sht ishlab chiqarishning 20 xil usulini sinab ko‘rgan.
Izoh (0)