Американинг Eat Just компанияси дунёда биринчи бўлиб суний гўшт сотиш рухсатини олган компания бўлди, деб хабар бермоқда Reuters. У рухсатни Сингапур озиқ-овқат идорасидан (SFA)дан олган. Эндиликда компания АҚШда ҳам шундай рухсатнома олишга эришмоқчи.
Компания яқин келажакда Сингапур ресторанларига лабораторияда етиштирилган товуқ гўштини GOOD Meat бренди остида сотишни бошлайди. Кейинчалик бундай гўшт чакана савдода сотила бошланади.
«Келиб тушган таклифларни баҳолаш ва уларнинг хавфсизлигини аниқлашдан сўнг Американинг Eat Just компаниясига Сингапурда сунъий етиштирилган товуқ гўштини сотишга рухсат беришга қарор қилинди», — дейилади хабарда. Шу билан бирга, ташкилот раҳбари Тан Ли Кимнинг таъкидлашича, «ходимлар хавфсизликни баҳолашда давом этади, мутахассислар билан кейинги маслаҳатлашувларни ўтказади ва бозорга бевосита келиб тушган янги маҳсулотларни кузатади».
Шунингдек, Eat Just вакиллари «лабораторияда ишлаб чиқарилган гўшт микробларнинг таркиби жиҳатидан анча тоза» эканлигини билдирган. «Шунингдек, ўтказилган таҳлиллар унинг таркибида оқсил, турли хил аминокислота, фойдали ёғлар ва минераллар кўпроқ эканлигини кўрсатди», — дейилади компания хабарида.
Сунъий гўшт лабораторияларда ҳайвон ҳужайраларидан яратилади. Яратилиш жараёнида бирорта жонивор ҳам нобуд бўлмайди. Олимлар ҳайвон ҳужайраларини ҳар хил усулда олиши мумкин, улардан бири биопсия. Кейин ҳужайралар биореакторга жойлаштирилади ва оқсиллар, аминокислоталар, минераллар, шакар, туз ва бошқа озиқ моддалар аралашмаси билан озиқлантирилади. Eat Just вакилларининг сўзларига кўра, компания мутахассислари керакли натижага эришишдан олдин сунъий гўшт ишлаб чиқаришнинг 20 хил усулини синаб кўрган.
Изоҳ (0)