Prezident Shavkat Mirziyoyev O‘zbekiston xalq shoiri Abdulla Oripov va xalq yozuvchisi O‘tkir Hoshimov tavalludining 80 yilligini, shuningdek, xalq artisti Botir Zokirov tavalludining 85-yilligini tantanali nishonlash to‘g‘risidagi qarorni imzoladi, deb xabar beradi O‘zA.
Ishlab chiqilgan dasturga ko‘ra, 2021-yilning mart va avgust oylarida “O‘zbekiston” xalqaro forumlar saroyi va O‘zbek milliy akademik drama teatrida mos ravishda Abdulla Oripov va O‘tkir Hoshimovning xotirasiga badiiy-adabiy kecha o‘tkazish rejalashtirilgan.
Ularning “Tanlangan asarlar”i, qoraqalpoq, rus, ingliz va boshqa tillarga tarjima qilingan holda chop etiladi, shuningdek, Abdulla Oripov va O‘tkir Hoshimov zamondoshlari xotirasida kitobini nashrga tayyorlab, chop etiladi. Shoir va yozuvchi hayotligida yashagan xonadonlarga yodgorlik lavhasi o‘rnatiladi.
Bundan tashqari, Abdulla Oripovning hayoti va ijodiy faoliyati haqida hujjatli film yaratiladi, mamlakat teatrlarida Abdulla Oripov asarlari asosida spektakllar sahnalashtiriladi. Toshkentdagi ko‘chalardan biriga O‘tkir Hoshimov nomi beriladi.
2021-yil dekabr oyining birinchi o‘n kunligida O‘zbekiston Xalqaro anjumanlar saroyida Botir Zokirov tavalludining 85 yilligiga bag‘ishlangan xotira kechasi o‘tkaziladi. Toshkentda O‘zbekiston xalq artisti Botir Zokirov nomidagi milliy estrada oliy maktabi tashkil etiladi, u yerda xonanda xotirasiga bag‘ishlangan yodgorlik majmuasi va muzeyi barpo qilinadi.
Badiiy akademiya tomonidan Botir Zokirov haykalini yaratish bo‘yicha tanlov e’lon qilinib, u Toshkent shahrida belgilangan tartibda o‘rnatiladi. Botir Zokirov xonadoniga yodgorlik lavhasi o‘rnatiladi.
Shuningdek, Botir Zokirov tahsil olgan O‘zbekiston davlat konservatoriyasi joylashgan ko‘chaga Botir Zokirov nomi berilib, O‘zbekiston davlat filarmoniyasining Milliy estrada-simfonik orkestri bilan Botir Zokirov nomidagi estrada orkestrini birlashtirib, Botir Zokirov nomidagi milliy estrada-simfonik orkestri tashkil etiladi.
Avvalroq Toshkentdagi Adiblar xiyobonida o‘rnatilgan Ogahiy, Berdaq, Muqimiy, Furqat, Mahmudxo‘ja Behbudiy, To‘lepbergen Qayipbergenov, Aleksandr Faynbergning gipsdan yasalgan haykallari bronzaga almashtirilayotgani to‘g‘risida xabar berilgandi.
Izoh (0)