Puerto-Rikoda dunyodagi eng yirik radioteleskoplardan biri hisoblangan “Aresibo” qabul qiluvchi apparaturasi joylashgan ko‘p tonnalik platforma o‘z og‘irligini ko‘tara olmay, 305 metrdan qulashi oqibatida vayron bo‘ldi. Bu haqda AQSh Milliy ilmiy jamg‘armasi matbuot xizmatiga tayanib, “RBK” xabar berdi.
“1-dekabr kuni soat 07:55 da ‘Aresibo’ observatoriyasidagi 305 metrli teleskop platformasining qulab tushishi oqibatida antennalar va atrofdagi obyektlarga shikast yetdi”, — deyiladi xabarda.
Matbuot xizmatining aniqlik kiritishicha, qulash oqibatida hech kim jarohat olmagan. Hozirda ekspertlar yetkazilgan zarar va konstruksiyaning qulashi oqibatida yuzaga keladigan potensial ekologik xavfni baholash bilan shug‘ullanmoqda.
Amerika meteorologik jamiyati a’zosi va telejurnalist Debor Martorell o‘zining Twitter’dagi sahifasi orqali teleskopning qulashidan oldingi va keyingi suratlari bilan bo‘lishgan. Uning so‘zlariga ko‘ra, suratlardan biri 30-noyabr kuni, ikkinchisi — 1-dekabr kuni olingan.
Ayer fue la última vez que visite esta belleza de lugar. Lamentablemente agonizaba. Aquí imágenes de ayer y hoy. pic.twitter.com/jWuAwtUc1s
— Deborah Martorell (@DeborahTiempo) December 1, 2020
Teleskop konstruksiyasining buzilishi 2020-yil avgustida boshlangan edi. O‘shanda yordamchi troslardan biri uzilib ketib, antennani teshib qo‘ygan. Oradan bir necha oy o‘tgach, asosiy troslardan yana biri uzilib ketgan. Mutaxassislarning aniqlashicha, teleskopning vayron bo‘lgan konstruksiyasi juda beqaror bo‘lib qolgan va uni ta’mirlash ishchilar hayotiga xavf tug‘dirgan. Observatoriya ishini to‘xtatish bo‘yicha qaror qabul qilingan.
1974 yilda “Aresibo” observatoriyasidan Yerdan 25 ming yorug‘lik yili uzoqligida joylashgan M13 yulduzlar turkumidagi tomon o‘zga sayyoraliklarga kodlangan radiomurojaat yo‘llangan. Unda olimlar Frenk Dreyk va Karl Sagan tomonidan inson DNKsini kodlangan ma’lumotlari o‘rin olgan.
Izoh (0)