“Chane-5” Xitoy kosmik apparatining qo‘nish moduli orbita kompleksidan ajralib, Oy yuzasiga qo‘nish uchun tayyorgarlikni boshladi. Bu haqda Xitoy milliy kosmik boshqarmasiga (CNSA) tayanib, “RBK” xabar berdi.
Orbita modulidan ajralish 30-noyabr kuni Toshkent vaqti bilan 01:40 da sodir bo‘lgan. Orbita apparati ortga qaytadigan kapsula bilan birgalikda Oy orbitasida qoladi.
CGTN telekanali ma’lumotlariga ko‘ra, modul Oy yuzasiga uch kundan so‘ng qo‘nishni amalga oshirishi kerak. Qo‘nganidan so‘ng u 2 metrga yaqin chuqurlikda burg‘ilash ishlarini olib borib, tuproq namunasini yig‘adi. Jami 2 kilogrammcha namuna yig‘ish rejalashtirilgan. Uchish moduli konteyner ichiga joylashtirilgan tuproq namunalarini orbita apparatiga eltadi, shundan so‘ng kapsula u bilan birga Yerga qaytishi lozim.
Avvalroq Xitoy Oyni tadqiq etish uchun “Chane-5” zondi ortilgan “Chenchjen-5” raketasini muvaffaqiyatli uchirgani to‘g‘risida xabar berilgandi.
Eslatib o‘tamiz, 2019-yilning aprelida Xitoy boshqa ko‘plab mamlakatlar qatori, Oyga o‘z odamini qo‘ndirish imkoniyatini ko‘rib chiqayotgani ma’lum bo‘lgandi. May oyida esa “Yuytu-2” lunoxodi Oyning orqa tomonida Oy mantiyasining ikki xil jinslarini topgan edi.
Izoh (0)