Хоразм вилоятида 800 квадрат метр ер майдонидан иборат қурилиши тугалланмаган уй-жойнинг олди-сотди шартномасини бекор қилиш ҳақидаги фуқаролик ишини ижобий ҳал қилиб бериш эвазига пора олаётган судья қўлга олинган. Бу ҳақда Олий суд матбуот хизмати раҳбари Азиз Абидов «Дарё»га маълум қилди.
Бундан аввал Урганч туманлараро суди судьяси пора сифатида келишилган 10 минг долларнинг 1200 долларини олаётган вақтида ашёвий далиллар билан қўлга олингани ҳақида хабар берилган эди.
Олий суднинг маълум қилишича, 2020 йил 3 октябрь куни фуқаро Х.Р. Урганч туманлараро судининг судьяси А.С. қурилиши тугалланмаган уй-жойнинг олди-сотди шартномасини бекор қилиш ҳақидаги фуқаролик ишини ҳал қилиб бериш эвазига 10 минг доллар талаб қилаётгани юзасидан Хоразм вилоят прокурори номига ариза билан мурожаат қилган.
Аниқланишича, Урганч туманлараро судининг судьяси А.С. аризачининг даъво аризаси асосида фуқаролик ишлари бўйича Боғот туманлараро судининг судьяси Ж.М. томонидан кўриб чиқилаётган жавобгар Г.М.га нисбатан Хива шаҳрида жойлашган 800 квадрат метр ер майдонидан иборат қурилиши тугалланмаган уй-жойнинг олди-сотди шартномасини бекор қилиш ҳақидаги фуқаролик ишини судья Ж.М.га пора берган ҳолда ижобий ҳал қилиб бериш эвазига 10 минг доллар сўраган.
Аризага асосан ўтказилган тезкор тадбирда фуқаролик ишлари бўйича Урганч туманлараро судининг судьяси А.С. фуқаро Х.Р. дан талаб қилинган 10 минг доллардан кимёвий ишлов берилган 1 200 долларини олган вақтида, ашёвий далиллар билан жиноят устида ушланган.
Судьялар олий кенгашининг А.С.ни Жиноят кодексининг 168-моддаси (фирибгарлик) 3-қисми «а» (кўп миқдорда), «в» (хизмат мавқейидан фойдаланиб содир этилган) банди ва 28, 211-моддаси (пора бериш) 2-қисми «б» (кўп миқдорда) банди билан жиноий жавобгарликка тортишга розилик бериш тўғрисидаги хулосаси берилган. Шунингдек, Олий суд Пленумининг А.С.ни жиноий жавобгарликка тортиш ва қамоққа олишга розилик бериш тўғрисида қарори чиқарилган.
Судьялар олий кенгашининг қарори билан А.С. лавозимидан озод этилиб, ваколати муддатидан илгари тугатилган. Ҳозирги кунда ушбу жиноят иши юзасидан тергов ҳаракатлари олиб борилмоқда.
Аввалроқ Тошкент вилоятида озодликни чеклаш жазосини ўтаётган шахснинг зиёфатида қатнашган судьялар жаримага тортилган ва лавозими пасайтирилгани ҳамда Тошкентда ЙПХ ходимини калтаклаган икки судья лавозимидан олиниб, шеригига ҳайфсан берилгани маълум қилинган эди.
Изоҳ (0)