Шавкат Мирзиёев 1 декабрь куни элбоши Нурсултон Назарбоев билан телефон орқали мулоқот қилиб, уни ва Қозоғистон халқини Қозоғистон Республикаси биринчи президенти куни билан табриклади.
Президент матбуот хизматининг ёзишича, Шавкат Мирзиёев элбошининг замонавий Қозоғистонни барпо этиш ва изчил ривожлантириш, мамлакатнинг халқаро майдондаги нуфузини оширишдаги тарихий роли, шунингдек, Марказий Осиё минтақасида дўстлик ва яхши қўшничилик муносабатларини мустаҳкамлашга қўшган катта ҳиссасини алоҳида қайд этди.
Икки мамлакат етакчилари Ўзбекистон ва Қозоғистон ўртасидаги стратегик шериклик, ўзаро ишонч ва қўллаб-қувватлаш принципларига асосланган кўп қиррали муносабатларнинг бугунги даражасини юқори баҳолади. Халқаро ва минтақавий аҳамиятга молик долзарб масалалар юзасидан ҳам фикр алмашилди.
Ўзбекистон Президенти, шунингдек, Қозоғистон президенти Қосим-Жўмарт Тўқаев билан ҳам мулоқот ўтказди. Давлат раҳбари уни биринчи президент куни билан самимий қутлаб, тинчлик, фаровонлик ва равнақ тилади.
Суҳбат чоғида Ўзбекистон ва Қозоғистон ўртасидаги дўстлик, яхши қўшничилик ва стратегик шериклик муносабатларини мустаҳкамлашнинг долзарб масалалари кўриб чиқилди. Амалий ҳамкорликка оид қўшма лойиҳа ва дастурларни, аввало, савдо-иқтисодий, инвестициявий ва гуманитар соҳаларда илгари суришга алоҳида эътибор қаратилди.
Президентлар халқаро кун тартибини, жумладан, шу ойда Ўзбекистон раислигида бўлиб ўтадиган МДҲ саммитига тайёргарлик кўриш масалаларини ҳам муҳокама қилди. Ҳамдўстлик ва бошқа минтақавий ҳамда глобал тузилмалар доирасидаги яқин мулоқотни давом эттиришга тайёр эканликларини таъкидлади.
Бундан аввал Шавкат Мирзиёев Россия президенти Владимир Путин билан телефон орқали мулоқот қилиб, COVID-19’га қарши Россия вакцинасини муҳокама қилгани хабар берилган эди.
Изоҳ (0)