Oliy Majlis Qonunchilik palatasi devoni binosida 155 kvadrat metrlik maydonni oshxona yuritish bo‘yicha ijaraga olish huquqini yutib olgan “Nasiba rizq” MChJ bugungi kungacha ushbu obyektdan foydalana olmayapti, deya xabar bermoqda “Kun.uz”.
Ma’lum qilinishicha, 2020-yilning 20-avgust kuni Elektron-onlayn auksionlarni tashkil etish markazi tomonidan o‘tkazilgan onlayn auksionda qatnashgan “Nasiba rizq” MChJ Oliy Majlis Qonunchilik palatasi devoni binosida 155 kvadrat metrlik maydonni oshxona yuritish bo‘yicha ijaraga olish huquqini yutib oladi. Ammo tadbirkor bugungi kungacha ushbu obyektdan foydalana olmayapti.
Shu muammo yuzasidan Matluba Boyeva Qonunchilik palatasi devoni mansabdor shaxslarining xatti-harakatlaridan noroziligini bildirgan.
“Auksionda yutganimdan so‘ng, Elektron onlayn auksionlarni tashkil etish markazidan g‘oliblik bayonnomasini va Bo‘sh turgan obyektlardan samarali foydalanishni tashkil etish markazining Toshkent shahar hududiy boshqarmasidan uch tomonlama shartnomani olib, imzolash uchun darhol Qonunchilik palatasi devoniga bordim. Noma’lum sabablarga ko‘ra men bilan shartnoma tuzishni paysalga solishdi. Bu yer “rejimniy” obyekt, ko‘chadan kelgan har kim bilan ishlayvermaymiz, degan javob oldim.
Belgilangan muddat o‘tib ketmasidan ijara shartnomasini tuzish ilinjida qayta-qayta bordim. Ammo urinishlarim behuda ketdi. Ular shartnoma tuzish muddati o‘tib ketishiga sun’iy ravishda erishishdi. Qarabsizki, keyingi murojaatlarimga ‘muddat o‘tib ketgan’ degan javobni olaverdim”, – deydi tadbirkorlik qilmoqchi bo‘lgan ayol.
Matluba Boyevaning virtual qabulxonaga yo‘llagan murojaatiga Oliy Majlis Qonunchilik palatasi devoni tomonidan berilgan javobda ko‘rsatilgan muddat davomida davlat mulki obyektining ijara shartnomasi tuzilmaganligi sababli auksion bayonnomasi o‘z kuchini yo‘qotgani ma’lum qilinadi.
Davlat aktivlarini boshqarish agentligi huzuridagi Bo‘sh turgan obyektlardan samarali foydalanishni tashkil etish markazining Toshkent shahar hududiy boshqarmasi bo‘lim boshlig‘i Baxtiyor Begimqulov ushbu vaziyat bo‘yicha quyidagilarni ma’lum qildi.
“20-avgust kuni ‘Nasiba rizq’ MChJ Oliy Majlis Qonunchilik palatasining mahkamasida oshxona ochish bo‘yicha auksionda g‘olib bo‘lgan. Ijara shartnomasini imzolashi uchun tadbirkorga shartnoma loyihasini chiqarib berganmiz.
Tadbirkor ijara shartnomasini tuzish uchun shartnomani Oliy Majlisga olib borib bergan. Ko‘rib chiqamiz, deb olib qolishgan. Ammo bayonnomada shunday shart borki, shartnoma loyihasi berilgandan so‘ng, 20 kun ichida shartnoma imzolanmasa, bayonnoma bekor bo‘ladi. Shartnoma imzolash uchun tadbirkor tomonidan Oliy Majlisga olib borilganida, u yerda imzolanmasdan ushlab turilgan va shartnoma imzolash muddati o‘tib ketgan”, – deydi Baxtiyor Begimqulov.
U shartnomani imzolash masalasida tadbirkor tomonidan biror bir muddat buzilishi yoki kamchilik o‘tmaganini ta’kidladi.
Ushbu masala yuzasidan izoh olish uchun Oliy Majlis Qonunchilik palatasi devoni bilan ham bog‘lanilganda devon rahbari M.Miralimov auksionda yutgan M.Boyeva devonga 3-4 marta kelganini, oshxona binosi Oliy Majlisga tegishliligini, ammo uning ichidagi pechlar va stol-stullar ‘Navro‘z’ restoraniga tegishliligini, ushbu restoran devon oshxonasini devon bilan kelishmasdan o‘zboshimchalik bilan auksionga chiqarib yuborganini, restoran faqat oshxona ichidagi jihozlarga xo‘jayinligini va binoga xo‘jayinlik qilolmasligini bildirdi.
Shuningdek, auksionda yutgan tadbirkor 20 kun ichida rasmiy xat bilan devonga murojaat qilishi lozim bo‘lgani, biroq tadbirkor tomonidan devonga bunday xat jo‘natilmaganini ta’kidladi.
Devon rahbari oshxonaning keyingi taqdiri nima bo‘lganiga ham oydinlik kiritdi.
“Ushbu voqealardan xabar topgan spiker masalani deputatlar hukmiga tashladi. Deputatlar Kengashda istisno tariqasida tender o‘tkazmasdan ‘Navro‘z’ restorani bilan qaytadan shartnoma tuzilsin, deb qaror chiqarishdi. Bu qaror qonuniy kuchga ega. Uni hech kim bekor qilolmaydi.
Faqatgina 150 nafar deputat ovoz bersagina bekor bo‘lishi mumkin. Shu paytgacha rasmiy marosimlar, rasmiy delegatsiyalar uchun ‘Navro‘z’ restorani xizmat ko‘rsatgani tufayli deputatlarning ovqatlanish masalasini ham ‘Navro‘z’ restoraniga topshirish haqida kengash qarori chiqarildi.
Mabodo tadbirkor nimadandir norozi bo‘lsa, bemalol sudga murojaat qilishi mumkin”, – deydi M.Miralimov.
“Navro‘z” restorani ishonchli hamkor bo‘lsa, unda nega oshxona auksionga qo‘yib yuborilgani bo‘yicha berilgan savolga M.Miralimov yozda “Navro‘z” restorani og‘ir ahvolga tushib qolib, bankrotlik e’lon qilish yoqasiga kelib qolgani, bir muddat o‘tib esa restoran faoliyati qayta yo‘lga qo‘yilib, oshxonani o‘zlari takroran yuritmoqchi bo‘lganliklarini bildirdi.
Yuqoridagi fikrlardan shu narsa kelib chiqadiki, “Navro‘z” restorani bankrotlik yoqasiga kelib qolganida Oliy Majlis Qonunchilik palatasi binosidagi oshxona auksionga qo‘yilgan, restoran o‘zini tiklab olishi bilan auksionda yutgan boshqa bir tadbirkordan oshxona yana qayta restoranga olib berilgan.
Oliy Majlisi Qonunchilik palatasi Reglamentining 36-moddasida Qonunchilik palatasi Kengashining vakolatlari sanab o‘tiladi. Ammo sanalgan vakolatlari qatorida bo‘sh turgan davlat obyektlarini istisno tariqasida auksion o‘tkazmasdan biror-bir tadbirkorlik subyektiga shartnoma asosida topshirish haqida qaror chiqarish vakolati nazarda tutilmagan.
Shuningdek, 2019-yil 19-fevraldagi PF-5666-sonli Prezident farmonining 4-bandida 2019-yil 1-iyuldan boshlab davlat ko‘chmas mulk obyektlarini ijaraga berish bo‘yicha savdolar “E-ijro auksion” elektron savdo maydonchasi orqali amalga oshirilishi belgilangan.
Bundan tashqari, 2020-yil 21-avgustda rasmiylashtirilgan onlayn auksion bayonnomasida oshxona binosini auksionga qo‘yish uchun asos bo‘lgan hujjat sifatida Oliy Majlis Qonunchilik palatasi binosidan foydalanish boshqarmasining 2020-yil 29-yanvardagi 18-sonli xati keltirilganini e’tiborga olinsa, Qonunchilik palatasiga tegishli obyekt, ya’ni oshxona binosi “Navro‘z” restorani tomonidan o‘zboshimchalik bilan auksionga chiqarib yuborilgani va bundan Qonunchilik palatasi devonining bexabar bo‘lganligi haqidagi izohlar haqiqatdan yiroq ekani oydinlashadi.
Avvalroq qashqadaryolik tadbirkor uch kun elektrsiz qolgani sabab olti mingta tovug‘idan ayrilgani hamda tadbirkorlar faoliyatiga aralashgan uch viloyat hokimliklari va IIBlariga nisbatan ish qo‘zg‘atilgani haqida xabar berilgandi.
Izoh (0)