Олий Мажлис Қонунчилик палатаси девони биносида 155 квадрат метрлик майдонни ошхона юритиш бўйича ижарага олиш ҳуқуқини ютиб олган «Насиба ризқ» МЧЖ бугунги кунгача ушбу объектдан фойдалана олмаяпти, дея хабар бермоқда «Kun.uz».
Маълум қилинишича, 2020 йилнинг 20 август куни Электрон-онлайн аукционларни ташкил этиш маркази томонидан ўтказилган онлайн аукционда қатнашган «Насиба ризқ» МЧЖ Олий Мажлис Қонунчилик палатаси девони биносида 155 квадрат метрлик майдонни ошхона юритиш бўйича ижарага олиш ҳуқуқини ютиб олади. Аммо тадбиркор бугунги кунгача ушбу объектдан фойдалана олмаяпти.
Шу муаммо юзасидан Матлуба Боева Қонунчилик палатаси девони мансабдор шахсларининг хатти-ҳаракатларидан норозилигини билдирган.
«Аукционда ютганимдан сўнг, Электрон онлайн аукционларни ташкил этиш марказидан ғолиблик баённомасини ва Бўш турган объектлардан самарали фойдаланишни ташкил этиш марказининг Тошкент шаҳар ҳудудий бошқармасидан уч томонлама шартномани олиб, имзолаш учун дарҳол Қонунчилик палатаси девонига бордим. Номаълум сабабларга кўра мен билан шартнома тузишни пайсалга солишди. Бу ер «режимний» объект, кўчадан келган ҳар ким билан ишлайвермаймиз, деган жавоб олдим.
Белгиланган муддат ўтиб кетмасидан ижара шартномасини тузиш илинжида қайта-қайта бордим. Аммо уринишларим беҳуда кетди. Улар шартнома тузиш муддати ўтиб кетишига сунъий равишда эришишди. Қарабсизки, кейинги мурожаатларимга ‘муддат ўтиб кетган’ деган жавобни олавердим», – дейди тадбиркорлик қилмоқчи бўлган аёл.
Матлуба Боеванинг виртуал қабулхонага йўллаган мурожаатига Олий Мажлис Қонунчилик палатаси девони томонидан берилган жавобда кўрсатилган муддат давомида давлат мулки объектининг ижара шартномаси тузилмаганлиги сабабли аукцион баённомаси ўз кучини йўқотгани маълум қилинади.
Давлат активларини бошқариш агентлиги ҳузуридаги Бўш турган объектлардан самарали фойдаланишни ташкил этиш марказининг Тошкент шаҳар ҳудудий бошқармаси бўлим бошлиғи Бахтиёр Бегимқулов ушбу вазият бўйича қуйидагиларни маълум қилди.
«20 август куни ‘Насиба ризқ’ МЧЖ Олий Мажлис Қонунчилик палатасининг маҳкамасида ошхона очиш бўйича аукционда ғолиб бўлган. Ижара шартномасини имзолаши учун тадбиркорга шартнома лойиҳасини чиқариб берганмиз.
Тадбиркор ижара шартномасини тузиш учун шартномани Олий Мажлисга олиб бориб берган. Кўриб чиқамиз, деб олиб қолишган. Аммо баённомада шундай шарт борки, шартнома лойиҳаси берилгандан сўнг, 20 кун ичида шартнома имзоланмаса, баённома бекор бўлади. Шартнома имзолаш учун тадбиркор томонидан Олий Мажлисга олиб борилганида, у ерда имзоланмасдан ушлаб турилган ва шартнома имзолаш муддати ўтиб кетган», – дейди Бахтиёр Бегимқулов.
У шартномани имзолаш масаласида тадбиркор томонидан бирор бир муддат бузилиши ёки камчилик ўтмаганини таъкидлади.
Ушбу масала юзасидан изоҳ олиш учун Олий Мажлис Қонунчилик палатаси девони билан ҳам боғланилганда девон раҳбари М.Миралимов аукционда ютган М.Боева девонга 3-4 марта келганини, ошхона биноси Олий Мажлисга тегишлилигини, аммо унинг ичидаги печлар ва стол-стуллар ‘Наврўз’ ресторанига тегишлилигини, ушбу ресторан девон ошхонасини девон билан келишмасдан ўзбошимчалик билан аукционга чиқариб юборганини, ресторан фақат ошхона ичидаги жиҳозларга хўжайинлигини ва бинога хўжайинлик қилолмаслигини билдирди.
Шунингдек, аукционда ютган тадбиркор 20 кун ичида расмий хат билан девонга мурожаат қилиши лозим бўлгани, бироқ тадбиркор томонидан девонга бундай хат жўнатилмаганини таъкидлади.
Девон раҳбари ошхонанинг кейинги тақдири нима бўлганига ҳам ойдинлик киритди.
«Ушбу воқеалардан хабар топган спикер масалани депутатлар ҳукмига ташлади. Депутатлар Кенгашда истисно тариқасида тендер ўтказмасдан ‘Наврўз’ ресторани билан қайтадан шартнома тузилсин, деб қарор чиқаришди. Бу қарор қонуний кучга эга. Уни ҳеч ким бекор қилолмайди.
Фақатгина 150 нафар депутат овоз берсагина бекор бўлиши мумкин. Шу пайтгача расмий маросимлар, расмий делегациялар учун ‘Наврўз’ ресторани хизмат кўрсатгани туфайли депутатларнинг овқатланиш масаласини ҳам ‘Наврўз’ ресторанига топшириш ҳақида кенгаш қарори чиқарилди.
Мабодо тадбиркор нимадандир норози бўлса, бемалол судга мурожаат қилиши мумкин», – дейди М.Миралимов.
«Наврўз» ресторани ишончли ҳамкор бўлса, унда нега ошхона аукционга қўйиб юборилгани бўйича берилган саволга М.Миралимов ёзда «Наврўз» ресторани оғир аҳволга тушиб қолиб, банкротлик эълон қилиш ёқасига келиб қолгани, бир муддат ўтиб эса ресторан фаолияти қайта йўлга қўйилиб, ошхонани ўзлари такроран юритмоқчи бўлганликларини билдирди.
Юқоридаги фикрлардан шу нарса келиб чиқадики, «Наврўз» ресторани банкротлик ёқасига келиб қолганида Олий Мажлис Қонунчилик палатаси биносидаги ошхона аукционга қўйилган, ресторан ўзини тиклаб олиши билан аукционда ютган бошқа бир тадбиркордан ошхона яна қайта ресторанга олиб берилган.
Олий Мажлиси Қонунчилик палатаси Регламентининг 36-моддасида Қонунчилик палатаси Кенгашининг ваколатлари санаб ўтилади. Аммо саналган ваколатлари қаторида бўш турган давлат объектларини истисно тариқасида аукцион ўтказмасдан бирор-бир тадбиркорлик субъектига шартнома асосида топшириш ҳақида қарор чиқариш ваколати назарда тутилмаган.
Шунингдек, 2019 йил 19 февралдаги ПФ-5666-сонли Президент фармонининг 4-бандида 2019 йил 1 июлдан бошлаб давлат кўчмас мулк объектларини ижарага бериш бўйича савдолар E-ijro auksion электрон савдо майдончаси орқали амалга оширилиши белгиланган.
Бундан ташқари, 2020 йил 21 августда расмийлаштирилган онлайн аукцион баённомасида ошхона биносини аукционга қўйиш учун асос бўлган ҳужжат сифатида Олий Мажлис Қонунчилик палатаси биносидан фойдаланиш бошқармасининг 2020 йил 29 январдаги 18-сонли хати келтирилганини эътиборга олинса, Қонунчилик палатасига тегишли объект, яъни ошхона биноси «Наврўз» ресторани томонидан ўзбошимчалик билан аукционга чиқариб юборилгани ва бундан Қонунчилик палатаси девонининг бехабар бўлганлиги ҳақидаги изоҳлар ҳақиқатдан йироқ экани ойдинлашади.
Аввалроқ қашқадарёлик тадбиркор уч кун электрсиз қолгани сабаб олти мингта товуғидан айрилгани ҳамда тадбиркорлар фаолиятига аралашган уч вилоят ҳокимликлари ва ИИБларига нисбатан иш қўзғатилгани ҳақида хабар берилганди.
Изоҳ (0)