DXX Namangan viloyati boshqarmasi xodimlarining Bojxona qo‘mitasining hududiy boshqarmasi xodimlarini jalb qilgan holda o‘tkazgan tezkor tadbirlari davomida psixotrop dori vositalari olib yurgan shaxslar ushlandi.
Xususan, Namanganning Yangiqo‘rg‘on tumanida yashovchi H.M. “Jiguli” haydab ketayotganda to‘xtatilib, avtomobil xolislar ishtirokida ko‘zdan kechirilganda, uning salonida 3360 dona “Lirika” dori vositasi borligi aniqlanib, protsessual tarzda rasmiylashtirib olingan. Tergovoldi surishtiruv harakatlari davomida ma’lum bo‘lishicha, mazkur shaxs ushbu kuchli ta’sir etuvchi dori vositalarini Qirg‘izistondan noqonuniy ravishda O‘zbekiston hududiga olib o‘tgan.
DXX xodimlarining boshqa huquqni muhofaza qiluvchi idoralar bilan hamkorlikda Qo‘qon shahrida o‘tkazgan tezkor tadbiri davomida esa mahalliy fuqaro A.A.ning avtomashinasidan va yashash manzilidan tarkibida giyohvand moddasi bo‘lgan 1056 dona “Tramadol” va kuchli ta’sir qiluvchi 1081 dona “Lirika” dori vositalari olingan.
DXX va Bojxona qo‘mitasi xodimlari tomonidan Andijon shahrida o‘tkazilgan tezkor tadbirda Nexia-3 avtomashinasi to‘xtatilib tekshirilganda, avtomobil egasi fuqaro X.I. va mashinadagi X.G. hamda M.O.da jami 249 dona “Tramadol”, “Lirika”, “Regapen”, “Tropikamid” dori vositalari borligi aniqlanib, o‘rnatilgan tartibda olib qo‘yilgan.
Qayd etilishicha, X.G. va M.O. muqaddam shu kabi xatti-harakatlarni sodir etganlik uchun javobgarlikka tortilgan.
Hozirda mazkur holatlar yuzasidan Jinoyat kodeksining tegishli moddalariga asosan jinoyat ishlari qo‘zg‘atilib, tergov harakatlari doirasida ushbu ishlarga aloqador boshqa shaxslarni ham aniqlash bo‘yicha chora-tadbirlar ko‘rilmoqda.
Mavzuga doir:
- O‘zbekistonda giyohvand moddalar savdosi bilan shug‘ullanuvchi uyushgan jinoiy guruh faoliyatiga chek qo‘yildi
- Toshkent, Andijon va Farg‘onada “Regapen”, “Lirika”, “Tramadol” psixotrop dorilarini noqonuniy sotayotgan fuqarolar hibsga olindi
- Samarqandda psixotrop dori vositalarining noqonuniy savdosiga chek qo‘yildi
Izoh (0)